EDITORYAL - Sakripisyo sa mga pasahero

Nagkadaghan ang mga passenger jeepneys kon PUJ’s nga mubo ra kaayo og atup nga sagad mapakong g’yud ang ulo sa mga pasahero sa ilang pagsakay kun dili sila magmatngon.

Mga pasahero, ilabi na kadtong mga tag-as nga tawo, masakripisyo g’yud sa ilang pagsakay niining mao nga mga PUJ nga mugbo ang gihabogon sa atup.

Kun makasakay man ang mga pasahero nga dili mapakong, adunay kahigayonan nga adto na kini mapangka sa gunitanan nga puthaw nga gibutang sa atup sa PUJ sa tanto’ng pagtutakilid sa sakyanan samtang magdagan.

Wala tingali kini makita sa atong mga opisyal sa kagamhanan kay kanunay ra man gud sila nagsakay og mga awto aron unta kahimoan kini og aksyon ug malikayan ang aksidente ngadto sa mga pasahero.

Ang Cebu City Council nagmugna og ordinansa nga dili morekomendar paghatag og prangkisa sa mga PUJ nga mugbo ra ang gitas-on ug milatid sila og sukod alang sa mga katugotan nga makadagan dinhi sa dakbayan aron daghan ang pasahero nga makasakay.

Apan wala kaayo kini mabantayi sa City Traffic Operations Management (CITOM) kay adunay mga PUJ’s nga mugbo ra ang sukod apan gitugotan ra nga makadagan-dagan.

Gawas niini, daghang mga PUJ’s nga mga dunot na ug kuyaw sa mga pasahero nga padayong nagbiyahe. Kun masangit ang tudlo sa mga pasahero sa dunot nga bahin sa puthaw ug mopadagan dayon ang drayber, unsay mahitabo?