Ang atong balaud nagprotihir sa katungod sa usa ka tawo sa butang nga iyang gipanag-iya. Ang tag-iya sa usa ka butang adunay katungod nga mogamit ug mo-enjoy niini. Aduna sab siya’y katungod nga mo-dispose o mopagamit niini ngadto sa ubang tawo. Apan kun ang usa ka tawo libreng gipagamit sa tag-iya sa usa ka butang sud sa pipila ka katuigan, aduna ba siya’y katungod nga magpabayad kun kuhaon na sa tag-iya ang butang nga gipagamit kaniya? Kana nga pangutana ang atong tubagon karon sa atong column.
Dear Atty. Divine;
Mangutana lang unta ko bahin sa akong gipuy-an karon kay gusto na ko nila papahawaon. Upat ka tuig na ko nga nagpuyo sa usa ka compound sa Lapu-Lapu City nga gipanag-iya sa akong higala. Ako ang nagpatukod sa balay nga made of light materials ug ang yuta nga akong gitukoran gipanag-iya sa akong higala. Misugot siya nga mopuyo ko sa maong lugar ug wa ko niya pabayra og abang. Apan iya sab ko nga gihimong caretaker sa maong property.Karong bag-o iya kong gipahibawo nga ila nang gamiton ang yuta busa iya na ming papahawaon. Ang akong pangutana attorney may katungod ba kami nga mangayo og bayad sa among pagpahawa sa maong lugar? Wa pa man mi nakita nga kabalhinan, unsa may maayo namong buhaton? Hinaut nga imo ming matambagan kun unsay angayan namong buhaton. Daghang salamat.— Leo
Dear Leo,
Kun ikaw gipapuyo sa maong yuta nga way bayad sud sa upat ka tuig angayan gyud kang magpasalamat sa imong higala. Karon nga gamiton na nila ang yuta natural lang nga ila gyud kang papahawaon. Kun nagplano ka nga magpabayad sa imong higala tungod sa iyang pagpapahawa kanimo dili sab na makiangayon kay gipapuyo na gani kang libre unya karon ikaw na hinuon ang magpabayad nga siya may tag-iya sa yuta. Kun ang imong gitan-aw mao ang imong nagasto sa pagpatukod sa imong balay, mamahimo man nga imo kining ipaguba aron magamit pa nimo ang mga materyales kay ikaw may tag-iya niana. Kun wa pa kay kabalhinan mas maayo nga mohangyo lang una ka sa imong higala nga hatagan ka og bisan 15 ka adlaw sa pagpangita og kabalhinan. Apan kun pananglit dili ka na niya mahatagan og lugway alang sa pagpangita og kabalhinan mas maayo nga maninguha sab gyud ka nga mangita og laing dapit nga imong abangan aron sab ang imong higala makagamit na sa yuta nga imong gi-ukopar sud sa upat ka tuig.Hinaut nga akong natubag ang imong pangutana. Thanks and God Bless. —Atty. Divine
Alang sa inyong pangutana ipadala lang sa Legal Corner sa Banat News or email sa flores_divina@yahoo.com. ug akong tubagon ang imong pangutana pinaagi sa akong column matag adlaw’ng Miyerkules ug Domingo.