Kun kulang sa tulog

Ang atong lawas, mayoras kini nga gibalanse aron kita mohimsog. Sa usa ka adlaw o 24 oras, gipatas kini pagbahig sa tag walo (8)…8 ka oras alang sa pagtrabaho… 8 ka oras sa dibersyon o ubang gimbuhaton ug 8 ka oras alang sa pagtulog o pahuway. Sagad sa anaa sa dakbayan, wa kaayo ni hatagi og pagpakabana, kay ang anaa sa isip mao man ang determinasyon sa paggukod alang sa ugma o kaugmaon, nga nasakripisyo hasta ang oras sa pagtulog.

Dili man gani maayo alang sa panglawas ang 16 oras nga pagtrabaho kay hago na kaayo o ma-stress na ang lawas ug utok. Unsa pa kaha kun kulang ka sa tulog? Kun imo ning gihimong istilo sa kinabuhi, anugon ang paningkamot mo.

Kay gidaut mo man ang bugtong puhunan sa kinabuhi nga mao ang kahimsog sa panglawas. Palyado na ang inandaran sa lawas, kay way husto nga pag-atiman o pag-tune up sa atong orasan o body clock. Magsige na’g hasol ang balatian mo.

Kay unsa bay maidulot nga epekto kun kulang o di kita katulog? Tungod sa kakapoy o kahago sa lawas, ang adrenalin dugay sad mokalma, nga manginit ang ulo mo ug motaas ang pagka-acidic sa lawas nga maoy hinungdan dali ka mataptan sa mga sakit sama sa diabetes ug sakit sa kasingkasing. Unya may mga dautang epekto pa nga sagad atong mamatikdan   kun kulang ta sa tulog.

(1) Makapatambok – Kun kulang sa tulog, ganado ta sa pagkaon kay gutom ang paminaw sa tiyan nga naghilab. Mao nga ang atong metabolism mohinay magluya ang mga sistima sa lawas. Mao nga dili ikahibung nga kanus-a ka way tulog mitambok hinuon. Kay sa pagtulog usahay di na mabati ang kagutom.

(2) Magul-anon nga saputon – Kun kulang sa tulog, mora’g lain ang paminaw sa atong emosyon. Magluya ta ingon sa way kalipay sa kinabuhi. Magul-anon nga bisa’g anaa sa paglingaw, masub-anon nga daling makahilak sa iyang kahimtang. Sa mga pagtuon, 50% sa mga tawong may depresyon,ilabi na kadtong may insomnia, sagad nila kulang sa tulog. Ang neurotransmitter  may kalabotan ani sa pagmata ug pagtulog, diin nakabase ang kabati o kaanindot sa atong emosyon.

(3) Itom ang palibot sa mata – Kun kulang sa tulog, ang tabontabon sa mata mangunot, maong itom nga tan-awon. Kun di kalikayan tungod sa gabii ang trabaho, inom og mga init nga health tea ug mga food supplements para sa utok ug sa immune system nga may kompleto’g nutrisyon, aron kita permi mobaskug.