Ang atensiyon nga gihatag sa pamilya karong mga panahona

Ning panahona atong makita sa telebisyon nga ang mga pamilya karon panahon sa Pasko adto na magyampungad sa mga malls, mga concerts ug sa mga shopping centers. Alang nila paagi na kini sa pagsaulog sa PASKO sa laktod nahimong commercialize ang kasaulogan ning panahona. Mahinungdanon kaayo nga kabahin sa pagsaulog sa Pasko mao ang maampoong pasalamat gumikan sa mga grasya nga nadawat. Kini ang kahulogan sa Misa de Gallo, panahon kini sa pagtukaw ug pag-ampo. Paagi sa pag-andam sa kaugalingon sa paagi nga espirituhanon.

Paagi kini sa pagpasalamat usab sa mga grasya nga nadawat gikan sa Enero padung sa Disyembre karong tuiga. Dugang pa, mas mahinungdanon usab nga karong mga panahona maoy maayong takna nga magpundo sa balay aron mogahin og hataas nga panahon kuyog sa pamilya. There is no better place than home matud pa nila. Dili kini mahitungod lang sa hikay kondili mahitungod kini sa panagkuyog. Bahala og yano ang kasaulogan basta kita magkuyog lang gyud dili ba?

International media

Ang Pilipinas kanunay gisantako sa kalamidad ilabi na gayod sa bagyo ug linog sama sa nahitabo sa Bohol ug Cebu  nga gitay-og sa kusog nga pag-uyog sa yuta. Ug sa ulahing kalamidad nga nahitabo sa Tacloban ug sa ubang dapit sa Visayas nga gimakmak pag-ayo sa kusog nga hangin sa Yolanda ug sa bangis nga storm surge, namatud-an kun unsa kamahinungdanon sa presensya sa International Media. Nakatap dayon ang balita sa dakong kalamidad, ug hapit tanang nasud sa kalibotan nagpadala’g hinabang dinhi sa Pilipinas.

Dako kaayo’g papel ang mga media sa laing nasud. Dili sila magpanuko og walay kahadlok nga moadto sa nahitaboan bisan unsa kini ka peligro. Ug pinaagi kanila, ilang isangyaw ang mga panghitabo. Ilang isulti ug isulat ang tinuod nga kahimtang sa mga dapit nga nabiktima sa kalamidad.

Sa nahitabo lang sa Tacloban ug sa ubang Visayas, nasayran dayon sa tibuok kalibotan ang tinuod nga kahimtang niini ilabi na mga tawo nga nahimong makaluluoy. Gani, giingon na man nga kapin sa 6,000 na ang nangamatay, ug kini nagpadayon pa sa pagdaghan. Sobra sa 27,000 ang nasamdan, ug duol sa 2,000 ang nangawala. Kini ang gipagawas nga balita sa National Disaster Risk Reduction and Management. Gawas niini, liboan ang mga balay nga naguba. Dili lamang ang mga local media ang isipon nga mga bayani sa panahon sa dagkong kalamidad nga mosulod sa Pilipinas, kondili hangtud na usab ang mga International Media. Kay kining mga tawhana gusto gayod motabang pinaagi sa ilang pagsangyaw sa hitabo sa tibuok kalibotan aron makuha ang pagtagad sa daghang mga nasod.

Pinaagi usab sa International Media, masayran sa kalibotan kun unsa ang sistema ug kakusog sa gihimong pagtubag sa atong gobyerno sa mga biktima sa kalamidad. Sama sa gibuhat ni Anderson Cooper, reporter sa CNN, nga mibulgar sa kawalay hustong sistem sa atong gobyerno sa pagtabang sa mga biktima sa bagyong Yolanda.

Busa makaingon gayod kita nga mahinungdanon kaayo ang International Media sa dagkong kalamidad nga mosulod sa Pilipinas.