Taga-city hall biktima diay ni Yolanda?

Samtang naguol kita sa nahitabo sa taga-city hall ning atong dakbayan sa Sugbo, sa ilang pagka-biktima sa bagyong Yolanda, nalipay usab kita tungod kay ato silang hatagan og tag-P20,000 isip calamity assistance. 

Pagka-swerte sa taga-city hall. Daghan diay kaayo’g kwarta ang city hall. Apan, nganong partial ra man ang cash assistance alang sa mga senior citizens? Ug ngano nga ang taga-city hall ra man ang nabiktima sa Yolanda … ang uban diay’ng molupyo sa Cebu City?

Anyway, nindot diay ning mabiktima ta sa katalagman … usahay! Ang konseho nakaembento og paagi nga inay Christmas bonus, ang ihatag calamity assistance. Pagka-bright gyud! Kuyaw la’g ma-disallow ni sa COA … kay ngano nga ang taga-city hall ra may nabiktima ni Yolanda … ang uban diay’ng molupyo sa siyudad … waa diay mi labut sa calamity assistance?

Ug sa 4,200 nga taga-city hall, ngano nga duha ra man ang waa mabiktima sa bagyong Yolanda … sila ra man si Konsehal Margot Osmeña ug Leah Japson, hinungdan nga mauwaw silang modawat sa P20,000?

Unsa man tuod ang mga kadaut nga nahiaguman sa taga-city hall nga hatagan man sila’g calamity assistance?

* * *

Si Kuntoro Mangkusubroto, mipahimangno nga gumikan sa corruption mapakyas ang mga paningkamot pag-rehabilitate sa mga dapit nga nabiktima sa kabangis ni Yolanda. Ang iyang giingon: “The enemy of reconstruction is always corruption!” Tukma kaayo.

In fact, maghisgut tag corruption … makadaot kini sa tanan, dili kay sa reconstruction lang. Sumaa, unsay nahitabo sa atong nasud karon, despite sa mga paningkamot ni Noynoy pagtul-id sa dalan paingon sa kaugmaran.

Kinsa man ni si Kuntoro? Siya ang nangulo, ang incharge pag-rehabilitate, pagpabarog pag-usab, pagpabangon sa nagusbat nga lalawigan sa Aceh sa Indonesia gumikan sa tsunami. Pagkadaku sa kadaut nga gibilin sa tsunami, yet, nagmalampuson sila didto sa Indonesia sa ilang rehabilitation effort.

Ug ang labing daku nga contribution sa ilang reconstruction, mao nga ilang gilikayan ang corruption. Ang reconstruction budget sa Indonesia, mikabat og $7.2 billion, ug ila kining giampingan kay matud pa, sensitive kaayo ang mga foreign donors sa issue sa corruption.  Niya pa: “So, I always tell my staff and all those organizations related to reconstruction of Aceh, we have to put strong protection so there is no corruption in the reconstruction.

“Nobody wants to donate funds that happen in corruption cases, so this is something that’s really on top of the agenda when we did our reconstruction in Aceh.”

Ang reconstruction effort sa Indonesia nahimong panig-ingnan, nahimong international role-model for post-disaster reconstruction and recovery. 

Daku kining tahas ni kanhi senador Panfilo Lacson isip reconstruction czar pagpahiuli sa mga dapit nga nagusbat sa bagyong Yolanda. Ug sa tambag ni Kuntoro, kinahanglan panalipdan ug ampingan ang binilyong salapi nga gahin alang sa reconstruction. Otherwise, kun masudlan ug kaduhigan sa corruption, segurong mapakyas ang reconstruction. Ping?