Kilig sa Kongreso
Gikilig ang tanang didto sa plenary hall sa kongreso niadtong miaging Biyernes sa gabii dihang usa sa mga kongresista mipadayag sa iyang tinguha nga makigminyo sa iyang hinigugma atubangan sa iyang mga kauban nga mga magbabalaud.
Ang Sugboanon nga si Kongresista Ashley Acedillo sa Magdalo Party-list miputol sa pagtuki sa 2014 national budget aron hatagan og agianan ang iyang proposal sa kaminyoon ngadto sa iyang hinigugma nga si Maria Pax Rosario Ocampo.
Si Acedillo mibarog alang sa usa ka personal privilege ug mihangyo ni Majority Leader Neptali Gonzales nga i-recognize ang iyang hinigugma. Gisugat ni Acedillo ang iyang hinigugma samtang ang mga kauban niining kongresista naglinya sa agianan nga daw sama sa nagsugat sa president atol sa State of the Nation Address kon SONA.
Gihalad ni Acedillo ang lab-as nga mga lukom sa buwak ngadto sa iyang hinigugma dungan ang iyang proposal nga mamahimo niya kining asawa. Dali nga gisanong ni Ocampo ang iyang hinigugma. Makakilig unsa no?
Apan luyo sa gibating kilig sa mga nakasaksi, ato kaha’ng pangutan-on ang atong kaugalingon kun husto ba nga gamiton ni bisan kinsang magbabalaud ang hawanan sa kongreso aron mohimo sa iyang proposal sa kaminyoon?
Nakasabot ko, tungod sa gugmang nag-uros-oros buot ni Acedillo nga mabatyagan sa iyang pangasaw-onon nga kini espisyal alang niya. Apan dunay daghang dapit nga angayang buhatan niini nga dili maibanan ang ka-ispisyal sa okasyon.
Ang imong putlon ang deliberasyon sa national budget aron lang isingit ang imong personal nga katuyoan, dili maayong tilimad-on sa usa ka opisyal. Bisan tuod kadiyot ra kaayo ang maong eksina, apan bati ang impression nga gibilin niini alang nako. Mas giuna niya ang personal kay sa iyang obligasyon sa nasud.
Ang hawanan sa kongreso dili sab intawon hustong dapit aron paghimo sa proposal. Mamahimo tingali ko nga “kill joy†sa akong baruganan, apan alang nako maisip nga pagyagayaga sa iyang trabaho ug sa katawhan nga misangon niya sa gimbuhaton isip ilang representante.
* * *
- Latest
