Lalaki kaduha nagpakasal, unsay angayang buhaton sa ikaduhang asawa?

Kaniadto wa giapil isip rekisitos alang sa pagkuha og marriage license ang Certificate of no marriage kon CENOMAR gikan sa NSO. Kini maoy hinungdan nga daghang nakalusot nga mga minyo na apan nagpakasal pag-usab sa laing babaye o lalaki. Kun ang tawo kaduha o katulo magminyo, ang iyang ikaduha ug ikatulong kaminyuon null and void kana basi sa atong balaod. Apan kun ikaw usa sa mga biktima sa bigamous marriage, unsay angayan nimong buhaton? Kana nga pangutana ang atong tubagon karon sa atong column.

Dear Atty. Divine,

Aduna lang unta ko’y ipangutana labot sa akong kaminyuon. Napulo ka tuig na ko nga naminyo ug aduna mi duha ka anak. Apan nagkabuwag mi sa akong bana karong bag-o human nako nahibaw-i nga aduna diay siya’y laing pamilya ug aduna sab siya’y mga anak. Basi sa akong nasayran nga minyo na diay siyang daan sa dihang siya nagpakasal nako ug nahulog nga kami ang iyang ikaduhang pamilya ug wa gyud siya mosulti kanako niini. Ang akong pangutana atty kun unsa may akong buhaton aron gyud akong makompirmar nga minyo na siyang daan sa wa pa siya magpakasal kanako? Kun pananglitan tinuod gyung kaduha na siya magminyo ug ako ang iyang ikaduhang asawa mamahimo ba nako nga ipa-annul ang among kaminyuon? Unsa may maayo nako nga buhaton? Hinaut nga imo kong matabangan kun unsay angayan nako nga buhaton? —Leslie

Dear Leslie,

Aron imo gyung mahibaw-an kun tinuod ba nga kaduha magpakasal ang imong bana, moadto ka sa National Statistics Office kon NSO ug mokuha ka og Certificate of no marriage kon CENOMAR sa imong bana. Pinaagi sa Cenomar imong mahibaw-an ang tanan kay makita man na didto kun kanus-a nagminyo ang imong bana, ug kinsay asawa busa kun kaduha siya nagminyo, duha sab ang mo-appear didto nga asawa. Kun ugaling kaduha gyud naminyo ang imong bana unya ikaw ang ikaduhang asawa matawag ang inyong kaminyuon nga bigamous marriage busa null and void kini basi sa Article 35 (4) sa atong Family Code. Apan kinahanglan gihapon ka nga modangop sa Korte aron ipadeklarar ang inyong kaminyuon nga null and void. Kini tungod kay basi sa mga desisyon sa Korte Suprema ang asawa o bana wa tugoti nga mo-assume sa ilang kaminyuon nga void kun dili ang korte ra gyud ang makadeklarar niini sa dili pa sila tugotan nga makaminyo pag-usab. Hinaut nga akong natubag ang imong mga pangutana. Daghang Salamat and God Bless.— Atty. Divine

Alang sa inyong mga pangutana, ipadala lang sa Legal Corner sa Banat News sa V. Gullas Street, Cebu City or email sa [email protected]. ug akong tubagon ang inyong pangutana matag adlaw’ng Miyerkules ug Domingo pinaagi sa akong column.