Daghang mga isyu nga may labot unta ang kinabag-ang Pilipino ang nabiyaan ug natabonan sa gubat sa Zamboanga city tali sa puwersa sa kagamhanan ug Moro National Liberation Front (MNLF) ug sa pork barrel scam ni Janet Lim Napoles.
Tulo sa importanteng isyu mao ang pagmahal sa bugas humay nga mura lang og wala himatikdi sa mga konsumedor; ang pagsige og taas sa presyo sa petrolyo; ug ang isyu sa barangay election diin padayong giduso ang pagpapas na sa Sangguniang Kabataan.
Piso ngadto sa tres pesos ang deperensiya sa presyo sa bugas humay karon diha sa kamerkadohan.
Mi-angal na unta ang mga kunsomedor, apan walay aksiyon nga gihimo ang National Food Authority (NFA) aron mapakubsan ang presyo.
Ang gihimo hinuon niini mao ang pagpaibog sa publiko sa pundo nilang hilabihan kadaghang mga sinakong NFA rice.
Walay nahimo ang NFA sa pag-stabilize sa presyo sa bugas humay.
Ang Malacañang wala gyud nato madunggi kalabot niining isyuha.
Samot na ang presyo sa petrolyo, grabe na kaayo kamahal, apan daw walay imik ang Malacañang niini bisan nag-agulo na sa epekto niini ang mga motorista, ilabi na ang mga drayber sa mga pampublikong sakyanan.
Ang gihimong rason sa mga higanteng kompaniya sa lana mao ang kagubot didto sa Middle East.
Ang debate kalabot sa pagwagtang sa SK tungod lagi kay ang kabatan-onan natudloan na og korupsiyon niining sistemaha, naundang ug nahilom tungod lagi sa pork barrel scam ug sa gubat sa Zamboanga.
Adunay lehitimong mga isyu nga angay tukion ang mga magbabalaod, apan bise kaayo sila sa pagdepensa sa ilang kaugalingon, ilabi na nga ang mga dagko sa senado nga silang kanhi Senate President Juan Ponce Enrile, mga Senador Jinggoy Estrada ug Bong Revilla ug mga kongresista gipangkasohan og plunder sa Ombudsman tungod lagi kay ang ilang pork barrel gipanghatag sa NGO ni Napoles.
Kining mga isyuha dili angay biyaan sa pagtuki tungod kay apektado ang kinabag-ang mga Pilipino.
Apan nabiyaan kini tungod sa duha ka isyu nga pulos walay hinungdan.