Botika nga way buot

Kun may mga tindahan pang nagpatuman sa “no return no exchange policy” hangtod karon angay silang gasahan og dakong kandado. Ug angay’ng tanggungon pag-apil sa tindahan ang kadagkoan sa Department of Trade and Industry (DTI) tungod sa ilang kapakyas pagpatuman ning usa sa labing batakang lagda pagpanalipod sa mga konsumidor.

Wa magkuwang ang DTI pagpahinumdom sa mga negosyante ug mga konsumidor nga ilegal ang pagdili sa pag-uli ug pag-ilis sa napalit na nga produkto. Apan may mga negosyante gyong gahi og ulo. Samang may mga konsumidor gyong moduko lang og paawot. Sa way paghisgot nga ang DTI mas maayo sa pagarpar kay sa aktuwal nga pagpatuman sa ilang mga lagda.

* * *

20 anyos nang lagda nga nagdili sa pag-uli ug pag-ilis sa nahalin nang mga produkto o nabayran nang mga serbisyo. Maong wa gyoy rason nga duna pay mga negosyante nga magpa-goryo-goryo hangtod karon. Bugtong panginahanglan nga gipahamtang sa Consumer Act of the Philippines mao nga dunay depekto ang produkto o nga di mao ang paghatag sa serbisyo.

Ubos sa lagda, gidid-an ang mga negosyante sa pagpahamtang og mas mubo nga lugway sa pag-uli ug pag-ilis, sama sa 24 ka oras o pito ka adlaw o usa ka buwan, kay 60 ka adlaw ang labing mubo nga panahon nga gihatag sa mga konsumidor.

* * *

Obligado ang mga negosyante pag-ilis sa depektusong produkto bisan nawa nang opisyal nga resibo kun ang konsumidor makapresentar og laing dokumento sama sa kontrata o billing. Di sab mahimong pasidan-an ang konsumidor nga di na mauli ang produkto kun maggamit na. Kay may mga depekto nga mahibaw-an lang atol sa paggamit.

Sa pikas nga bahin, di mahimong iuli sa konsumidor ang iyang napalit kay nakakita og mas baratong baligya sa pikas nga tindahan. O kay nausab lang ang iyang hunahuna ug nawad-an na sa gana pagpalit. O kay gituyo pagguba ang produkto.

* * *

Di ni maayong balita alang sa konsumidor nga nidangop sa Arangkada sa DYAB nga gibalibaran sa botika dihang iya untang iuli ang disinfectant nga napalit sa iyang gipalihog nga kaubang kawani aron pailisan og mas dako nga botelya sa samang disinfectant. Ubos sa lagda di siyang kapamugos sa botika pag-ilis sa iyang napalit.

Apan kun may gamay’ng sihag sa kabuot nga mosal-ot sa kahiktin sa panghunahuna sa mga tagduma angay nilang hangpon inay balibaran ang kustomer. Kay gawas nga mas dako ang halin makahatag pa gyud og alibyo sa kustomer kansang bugtong atraso mao rang pagkasipyat sa iyang sinugo sa tukmang gidak-on sa produkto. Nga segurong mobugti pinaagi sa pagbalikbalik sa botika. Sa pikas nga bahin kun paundayonan sa botika ang ilang kataphaw maaghat ang mga kustomer pagpangita og laing kapalitan nga may sentido kumon.

* * *

Email: [email protected].