EDITORYAL - Ang awhag sa mga pari sa mga politiko

Napul-an  na  ang  mga  pari  sa mga  binilyako  sa  mga  politiko hinungdan  nga  giawhag  niini  nga  tumanon nila ang  pagtulon-an  ni  Cristo  sa ilang  kalibotan.

Matud   pa  ni  Manila  Archbishop Antonio Tagle nga  kinahanglang  mosunod  ang  mga  politiko  sa kinabuhi  ni  Cristo.

Ang maong  awhag ni Arsobispo Tagle,  gisegundahan  usab  ni  Msgr. Esteban Binghay, ang Episcopal Vicar  sa Katoliko  sa Sugbo  kansang  pangandoy  gusto  nga ang mga  politiko  mahimong sumbanan sa pagtuman  sa  mga  sugo  ni  Cristo.

Apan  lisud  kaayo  sa  mga politiko  ang  pagsagop  sa  mga  pagtulun-an ni Cristo,  kay  bug-at kini  sa  mga  tawo  nga  niini  lang  kinabuhia  gisandig  ang  ilang  ugma.

Ang  mga  politiko, gamhanan  ug  sapian,  busa  wa kaayo  kini  magkinahanglan  nga  motuman  sa mga  maayong  sugo  ni Cristo. Ang  mga sugo  ni Cristo sa tawo kun tumanon  kini, maghatud  kaniya  sa kaluwasan  sa iyang  kalag  sa Iyang  pagbalik  nganhi  sa yuta.

Apan  di  makakat-on  ang  tawo niini  kun  di  siya  maminaw  sa magtutudlo  nga  gihatagan  og  katungod  ni  Cristo  sa pagwali  sa  mga  pulong  Niya  nga  nahisuwat  sa Biblia.

Busa  tungod  kay di  kini  niya  hikat-onan  kundi  siya  maminaw  sa magtutudlo  nga  may  katungod  niini, aw  lisud  alang  sa  mga  politiko  ang  pagsunod  sa  mga  pulong  ni  Cristo.

Naa  ra  man  mahisuwat  sa  Biblia  ang  mga  pulong  ni  Cristo,  unya  ang  mga  politiko  way  panahon  sa pagpaminaw  kun  kini  ipasabot  na  kanila.

Wa sila’y   laing  gitun-an  kundi  ang  paggama  og  balaod ug  ang  pagpalambo  sa ilang  negosyo  aron  labi  pa  nga  modatu.

Kun  ari  sila  sa mga  sugo  ni  Kristo  motutok,  malangay  sila  kay  kinahanglang  mosimba sila sa  mga  simbahan  sa  mga tawo  nga  Iya   ni  Cristo  sa  mga  gitakda  nga  adlaw  ug  oras  alang  niini.

Unya  estrikto  man  si Cristo kay  gusto  Niya nga  ang  tawo  nga  mosunod  Kaniya kinahanglang  makita kini  sulod  sa Iyang  pundok  nga  gitawag  sa Iyang  ngan.

Ang  mga  politiko wa  nay  panahon alang   niini, tungod  kay  sa  lugar  diin  gusto  ni Cristo  nga adto  ang  tawo  mag-alagad  Kaniya  ug  sa Dios, way  sikat  nga  mga  tawo nga  nagpasakop  niini.

Kasagaran  mga  kabus  ang membro  niini kinsa  naminaw  ug  mituo  sa  mga  pulong  ni Cristo  nga  gitudlo  kanila nga maghatud kanila  sa kaluwasan.