Baha sa botante
Way pagkunhod ang gidaghanon sa mga tawo nga buot moparehistro diha sa mga buhatan sa Comelec sa dakbayan sa Sugbo sukad pa niadtong unang adlaw sa pagpanglista sumad karon.
Padayon ang pagbaha sa mga bag-ong butante ug kadtong buot mobalhin sa pagbotar dinhi sa dakbayan.
Personal nakong nasaksihan ang proseso sa pagpanglista kagahapon ug labihan gyud ka dako sa problema sa Commission on Elections.
Una maglisod sila pagdawat sa tanang molinya matag-adlaw. Dili mahurot sa Comelec pag-accomodate ang tanang buot moparehistro tungod sa kakuwang nila og kahimanan.
Usa ka libo lang ang mamahimong dawaton sa buhatan sa Comelec matag-adlaw tungod kay wala sila’y igo nga data capturing machine.
Kun magpadayon nga ingon niini kadaghan ang mga moparehistro, nabalaka ko nga daghan ang dili makabotar karong umaabot eleksyon sa barangay.
Bisan si Comelec south district election officer Edwin Cadungog miangkon nga wala nila paabota nga ingon niini kadaghan ang magparehistro.
Matud ni Cadungog nga uno ngadto sa dos porsiyento lang ang gidaghanon sa mga botante nga moparehistro ang ilang gipaabot, apan niadtong Biyernes niabot na og tres porsiyento ang gidaghanon sa ilang narehistro.
Kadudahan ang maong gidaghanon. Nahadlok ko nga ang tinud-anay nga mga botante mao na hinuon ang dili marehistro tungod kay ang naniguro mao ang mga hinakot nga mga flying voters sa mga tikasan nga mga politiko.
Ang Comelec miangkon nga di gyud nila mahibaw-an kun tinuod ba nga residente sa usa ka barangay ang buot moparehistro.
Matud ni Cadungog nga ministerial lang ilang trabaho sa pagrehistro busa kun wala gyu'y moreklamo makalusot gyud ang mga tikasan nga mga politiko.
Hinaut masulbad na sab sa Comelec ang kakuwang nila og computers.
* * *
- Latest
