EDITORYAL - Ang lunop sa Cebu ug Mandaue cities

Di mosaler  ang  bisan  unsay  gisagop  sa kagamhanan  nga  mga  sistema  sa drainage  nga  open canal  o   imbornal  kun  mouwan  og  3 ngadto  sa 5 ka oras  dinhi  sa dakbayan.

Kini  ang  nasaksihan  sa   gatosan  ka tawo  niadtong  miaging  Sabado Hulyo 20.

Mibundak ang  uwan  sa  mga  alas 7:00  sa gabii  ug  hangtud  sa  mga alas 9:00  sa maong  kagabhion  apan  ang  north  reclamation  area    nga  karsada  gikan  sa SM  sa Cebu City  paingon  ngadto  sa Park Mall  sa  Mandaue  City  nahimong  lawod  sa milunop  nga  tubig  sa uwan.

May  mga  porsyon  nga  taga liog  ug  ang  labing  mabaw  mao  ang  taga hawak  nga  tubig.

Gawas  sa tubig sa  uwan,  ang pagsuyla  sa tubig  baha  gikan sa sapa  sa Mahiga Creek  ug  uban  pang  mga  sapa  ug esteros  sa maong  mga  lugar  nakatampo  og  di  basta-basta  nga giladmon  sa   tubig  nga  milunop  sa  maong  mga  lugar.

Didto  masinatii  sa  kadaghanan  nga nagdala  og  sakyanan  ang  kalisud  sa  pagbiyahe  samtang  nag-ubog  sa tubig  ang  imong  sakyanan.

Hinuon  ang  uban  miuli  kaadlawon  na tungod  kay  gipaabot  ang  paghutos  sa giladmon  sa tubig.

Ang  maong  talan-awon  hinaut  unta  nga  mohatag  og  igong  ideya  sa mga  mayor  sa duha  ka  dakbayan  nga  di  diay  igo ang  kasamtangang  mga  imbornal  nga anaa  sa kilid  sa  mga  karsada  karon.

Kini  tungod  kay  way  kabuhagayan  ang    tubig,  hinungdan  nga  didto  kini  mopundo  sa karsada  kansang  mga  masigkakilid  gisirad-an  sa kabalaka  nga  himoon  kining  yab-anan  sa  basura  sa katawhan.    

Ingon  niini  ang  kahimtang  sa  mga  kadalanan  sa  dakbayan  sa Sugbo  nga gipasagdan  na lang  ang  karaan  nga  mga  kanal  ug  imbornal  nga  anaa  sa ilawom  ug  gipikot  lang  ang  mga  dagkong  lungag  sa ibabaw  ug  kilid  sa mga  karsada  aron nga  di  kayab-an  og  basura  sa  mga  abusador  kaayong  mga  molupyo.

Apan  tungod  kay  sirado  na  ang  kilid  sa  mga  kadalanan,  natural  inig-uwan  anha  na  mopundo  sa ibabaw  sa karsada  ang  tubig  kay   puno  na man  ang   kanal  niini. Hinuon  mao  pay  pag-ingnon   nga  molunop  lang  kun  may  kusog  nga  uwan  ug  samtang  way  uwan, aw hayahay  ra  kaayo  ang   tanan.