Cover-up sa pilferage sa bugas sa CIP yard

Maayo unta og walay cover-up nga mahitabo sa imbestigasyon sa kinawatay og sinakong bugas diha sa Cebu International Port. Kining mga sinakong Vietnam rice nga giingon sa report sa The Freeman karon tipik sa dul-an 1,200 ka 20-footer container vans nga gisakmit sa Bureau of Customs ug isubasta sa publiko.

Si Atty. Tomas Riveral nagkanayon nga base sa pasiuna nilang imbestigasyon, usa ka Customs Police ug guwardiya sa Cebu Port Authority (CPA) ang nagtinabangay pagpangawat sa mga bugas.

Si Arneth Manquiquis, nangulo sa inventory team, nagkanayon nga siyam ka mga containers ang giingong gi-pilfered (gikawatan), apan wala pa madeterminar kun pila gyud ka sako ang nangawala.

Sa pasiunang impormasyon, nasayran nga mokapin sa 160 ka sako ang nangawala. Mo-uyon ko sa rekomendasyon ni Riveral nga ipasa og laing investigating agency ang maong kaso aron walay mahitabong cover-up. Kay kun isalig lang kini sa BOC, walay masilotan kay tapin-an man sa mga labaw ang ilang mga sakop nga gitudlong nanghilabot.

Na-estorya hinuon nako ang Customs Police, apan mihimakak siya sa kalabotan sa pagkahanaw sa mga sinakong bugas. Kay matud pa niya, ubos sa ISPS Code ang CIP busa maglisod siya sa pagsulod kun walay pagtugot sa CPA.

Kun wala pa tingale pugngi ni Finance Secretary Cesar Purisima ug Customs Commissioner Ruffy Biazon ang ikaduhang public auction sa maong mga bugas, dili seguro na makawat.

Gi-hold ang laing hugna sa subasta kay gusto ni Agriculture Secretary Proceso Alcala nga ang National Food Authority maoy papaliton sa mga bugas. Unya, nag-atang ang mga sakop sa rice cartel nga mao usab ang mopalit sa maong mga bugas nga paliton sa NFA sa baratong presyo nga P850 ang sako.

* * *

Mitiyabaw ang kanhi direktor sa Land Transportation Franchising and Regulatory Board sa rehiyon siete nga si Romulo Bernardes karon maoy direktor sa LTFRB-6 didto sa Ilo-Ilo kay nabiktima sa “smear campaign.” Gipasanginlan ni Bernardes ang hearing officer sa LTFRB-6 nga maoy nagpaluyo sa smear job batok niya kay matud pa gusto kining mopuli niya.

Sumala sa pasangil nga si Bernardes nangayo og P5,000 kada PUJ nga magbiyahean og Mandurriao-Hibaoan bugti sa pag-aprobar sa petition for route extension.

Si Bernardes nagkanayon nga ang duha ka transport leaders nga silang Raymundo Parcon ug Rizalito Alido gi-manipula lamang sa hearing officer nga si Rommel Duron.

Gipasanginlan hinuon ni Bernardes si Duron nga maoy responsable sa pagkahanaw sa mga bribe money nga gitanyag kaniya aron mapadali ang aplikasyon sa prangkisa.

Silang Parcon ug Alido gipanaktak sa ilang grupo nga mao ang City Alliance of Jeepney Operators and Drivers Association, kay sumala sa president niini nga si Benny Espinosa, kining duha nakasala sa grupo ug kusog kaayong mang-intriga.