EDITORYAL - Mga city scholar naningil sa city hall

Unsa  ka tinuod nga  wa  matuman  sa city hall  ang  gisaad  niining  allowance nga tag P 1,000  nga school  supply  sa  mga city scholar?

Makadaghan  kuno  kini  nga  gisaad  sa  mga  opisyal  sa city hall  ilabi  na  niadtong  pangampanya  nila  sa naghinangat  ang  piniliay  sa  Mayo 13, 2013.

Sa pagkakaron  mura  og wa  kini  tagda  ni  Mayor  Mike  Rama  kay iyang  gisandig ngadto  sa konseho.

Kun surambawon  sa konseho  nga  iyang  mga  kontra  partido  ang  maong  panaad, di kaha  mayabo  ang  pagsalig  sa mga  estudyante  ngadto  sa kagamhanan  ning  dakbayan.

Apan  kinsa  mang  mga  konsehala  ang  misaad  niini  ngadto  sa  mga estudyante?

Di baya  angay  nga  bugal-bugalan  ang  mga  anak  sa kabos  nga  pamilya  kinsa  maoy  nangita  niining  maong  mga  saad.

Kay  nganong  gisaaran  man  usab  sila  nga  hatagan  og  tag P1,000  nga  allowance alang  sa ilang  school  supply.

Kini  way  labot  sa tag P10,000  nga  gihatag  kanila  sa kagamhanan  sa ilang  pagpa-enroll  sa  mga  eskuylahan  nga akriditado  sa  city hall.

Nagtuo  usab  kita nga  di  lang  kay mga  estudyante  ang  nangita  niini  kundi  labaw  sa tanan  ang  mga  ginikanan  sa maong  mga  estudyante.

Busa  kun  di  kini tumanon  sa city  hall, aw  ang  mga scholar  karon kasagaran  botante  na sa  sunod  nga  election  ug  unsa  kaha  ka  dakong  problema  ang  atubangon  sa  mga  nanaad  niini .

Ang  mga  batan-on  dali ra kaayong  motuo  sa  mga  pasalig  ug bisan  ang  ila  mismong  mga  ginikanan  hinungdan  nga  mibotar  sila  sa mga  misaad  kanila  nga  mohatag sa maong  allowance.

Apan  kundi  kini  tumanon,  aw maminghoy   gyud  ang  mga  estudyante  karon.  Ug   sa umaabot  nga  election,    siguradong  maminghoy  usab  ang  mga opisyal  nga  wa motuman  sa maong  panaad.