Pagpamalandong alang sa Malangkubong Kaayohan

Ang daghang kabataan maoy napasanginlan ingon nga hinungdan sa nasinating kalisud. Nahimong nakasentro lang sa ilang kaugalingon ang mga ginikanan nga naglakip sa ilang kaugalingong mga panginahanglan lamang. Mao nga nahimong mentalidad karong panahona nga dili gyud maayo nga magdaghan og mga anak. Angay untang hinumdoman sa tanan nga dili kini isyu sa overpopulation o daghang mga bata kun dili isyu kini kun unsa ang atong gihimo aron ang matag usa kanato nagmabungahon.

Epekto sa pagdawat sa mga kaubanan

Nahimong sukaranan karon sa kalibutan ang kompetisyon. Kinahanglang dunay pagabitbiton ang matag usa nga puhonan aron dunay ikasugakod batok sa bisan unsang hulga ug panglupig. Ang bata nga dili guwapo o guwapa ang nahimong iwit sa ilang klase ug dili matagad. Ang bata nga walay abilidad diha sa paugnat sa kusog kun sa sports ang mahiklin sa daplin. Ang bata nga walay ikasarang sa iyang intelektuwal nga kapasidad, ang nahimong isalindot lamang, dili paminawon ug dili konsultahon. Kun diha mismo sa iyang kaugalingong panimalay ang bata nakasinati nang daan sa pagsalikway gikan sa iyang mga ginikanan, nan, unsaon man niya pagsagubang sa malupigong sistema sa katilingban? -- Sumpayan pa