Hugaw’ng kan-anan

Maayo segurong magsugod na usab og pang-inspeksiyon ang mga tinugyanan sa City Health Department (CHD) sa siyudad sa Sugbo sa mga gagmay’ng kan-anan nga nag-operate bisan sa kalapasan sa sanitation code. Dili angay paabuton nga adunay mokuyanap nga sakit una pa molihok ang CHD.

Niadtong miaging semana, kuyog sa akong higalang si Digoy Tanquiamco, gusto unta kaming mangaon sa Chinese Ngohiong luyo sa Gaisano Main sa dalan V. Gullas, apan sa dihang miyamar ko nga mopalit og mineral water, namalibad ang tinderang guwangon kay pulos ra kuno Pepsi ang ilang tinda ug nahurot na ang mineral water.

Sa dihang nanghangyo ko nga mopapalit lang og tubig sa gawas kay dili ko mo-inom og Pepsi sa pagka-buntag naka-inom na ko og softdrinks, ug softdrinks mas maayong 7-Up lang, pero ang tindera miingon nga nahurot na ilang 7-Up.

Nakahinumdom ko sa miagi nakong kaon nianang tindahana sa dihang moyamar ko mineral water o 7-Up, mo-insister gyud nga Pepsi na lang kay nahurot na ilang tubig o 7-Up. Nangutana ko sa akong kaugalingon unsa na lang gyud ko kademalas nga kada kaon nako adtong tindahana, Pepsi ra gyuy mahibilin sa ilang gitaya nga kahon.

Nakiglalis ko sa tindera sa pag-ingon nga maayong aduna usab sila’y tubig kay ang mangaon nga diabetic adunay kapilian nga dili makagrabe sa iyang sakit. Dili ko diabetic, apan walay kumo sa paglikay. Pero mapugos gyud og yarok og Pepsi ang mangaon kay walay kapili-an.

Sa dihang gisitar nako ang tinderang guwangon hain ilang libre nga tubig, iyang gitudlo ilang banggira nga hilabihan kahugaw, ang sibo ug buling nagsagol nga mura og tinuig ra malimpyohan.

Sa dihang akong gipangutana mineral water ba ang libreng tubig iyang gitudlo, susmaryosep, ang gripo diay sa MCWD nga puwerteng hugawa.

Iya kong payarokon adtong tubig gikan sa hugaw kaayong gripo.

Sa akong nahibaw-an, ang usa ka kan-anan kinahanglan modalit man gyud og libreng tubig sa ilang kustomer.

Ambot og aduna ba kahay clearance gikan sa Sanitary Inspector kining Chinese Ngohiong? Ug kun aduna man, akong awhagon ang CHD sa pag-inspeksiyon og balik sa kan-anan kun nakapasar ba sa standard nga gilatid sa sanitation code ang ilang sistema.

Aduna ba kahay Health Certificate kadtong guwangon nga babayeng nanakos sa ilang ngohiong ug kadtong mga babaye niyang kaabag?

Kun wala, maayong pamultahon kining tindahana sa ilang mga violations. Kasagaran sa mangaon sa maong tindahan mga estudyante ra ba ug mga trabahante.