Pagkadiskobre nga bayot ang bana mamahimo bang basihan pagpa-annul sa kaminyoon?

Ang atong balaod naglatid og basihan alang sa pagpa annul sa imong kaminyuon ilabi na  kun imong madiskobre human sa inyong kasal nga ang imong bana usa diay ka drug addict o aduna diay sakit nga sexually transmissible disease nga daan na niyang nasinati sa wa pa kamo maminyo ug wa sab kini gitug-an ngadto sa iyang umaabot nga kapikas. Apan kun madiskobre sa asawa nga ang iyang bana usa diay ka bayot, mamahimo ba sab kining basihan sa pagpa annul sa  ilang kaminyuon? Kana nga pangutana ang atong tubagon karon sa atong column.

Dear Atty. Divine,

Nag email ko nimo tungod sa akong problema sa akong bana. Gikasal mi three (3) years ago ug human sa among kasal milarga sab siya pagbalik sa gawas sa nasud kay tua man siya magtrabaho. Ang among sabot nga iya kung kuhaon aron mi mag-uban sa pagpuyo. Niadtong miaging tuig miuli siya ug akong namatikdan nga bugnaw na siya og tinagdan nako. At first naglibog ko kun unsay nahitabo niya hangtud nga ang akong usa ka friend nga kaila sab niya maoy nagsulti nako nga bayot diay ang akong bana ug aduna kini karoy gikarelasyon sa Japan nga usa sab ka Pilipino apan lalaki. Tungod niini, nagkaaway mi ug misamot na hinuon ka way klaro ang among kaminyuon. Busa ang akong pangutana attorney kun mahimo ba nga akong ipa-annul ang maong kaminyuon gumikan sa pagka bayot sa akong bana? Hinaut nga imong matubag ang akong pangutana.  — Ms. Lonely”

Dear Ms. Lonely,

Salamat sa imong pag-email. Kun imong makompirmar nga bayot  gyud ang imong bana bisan sa wa pa mo magminyo ug iya lang kini nga gitago diha kanimo, makonsiderar nga voidable ang inyong kaminyuon. Buot ipasabot nga mamahimo kining ipa-annul tungod kay ang iyang gihimo makonsiderar nga Fraud ug usa sa mga ground for Annulment of marriage ubos sa Family Code. Ang Article 45 in relation sa Article 46 sa atong Family Code nagkanayon:

“Art. 45. A marriage may be annulled for any of the following causes, existing at the time of the marriage:

(3) That the consent of either party was obtained by fraud, unless such party afterwards, with full knowledge of the facts constituting the fraud, freely cohabited with the other as husband and wife;

“Art. 46. Any of the following circumstances shall constitute fraud referred to in Number 3 of the preceding Article:

(4) Concealment of drug addiction, habitual alcoholism or homosexuality or lesbianism existing at the time of the marriage.

Buot ipasabot nga ang iyang pagtago kanimo nga usa diay siya ka bayot sa wa pa mo maminyo usa ka matang sa Fraud ug ground for annulment of marriage.

Kun desidido gyud ka nga makigbuwag sa imong bana ug di na gyud nimo ma-save pa ang inyong kaminyuon mas maayo nga moadto ka og abogado aron iyang matun-an ang imong kaso ug aron imong mapasaka ang imong Petition alang sa pagpa annul sa imong kaminyuon ug aduna kay lima ka tuig alang sa paghimo niini gikan sa imong pagkadiskobre sa iyang pagkamahuyang. Hinaut nga akong natubag ang imong pangutana. Thanks and God Bless. —   Atty. Divine

Alang sa inyong pangutana, ipadala lang sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.