Goons sa One Cebu; politika sa Mandaue

Angayang palapdan ang imbestigasyon nianang 14 ka gidudahang mga goons nga nadakpan sa duha ka lungsod sa segundo distrito sa lalawigan sa Sugbo aron mailhan kinsay mga dagkong politiko nga nalambigit niini.

Nahibaw-an sa mga awtoridad nga kining mga goons gi-hire sa mga sakop sa One Cebu Party nilang Pablo John Garcia ug Pabling Garcia.

Namantala sa The Freeman ang nabawi nga sample ballot gikan sa mga dinakpan nga mga goons nga ang gipang-itoman nga lingin iya sa ngalan ni Pabling Garcia pagka-kongresista sa segundo distrito, Pablo John Garcia pagka-gobernador ug Boboy Durano pagka-bise gobernador.

Nakuhaan usab sila og mga armas, drugas ug kuwarta nga gilup-itan sa sample ballot sa One Cebu party.

Sa Alegria, usa ka kandidato pagka-konsehal ang gitudlo nga maoy nagdala sa 10 ka mga goons. Aduna pa gyu’y laing siyam nga gilutos karon sa mga awtoridad.

Didto sa Santander, usa ka kapitan sa barangay ang naggunit sa upat ka mga goons.

Maayo na lang kay hilabihan kaabtik sa kapolisan ug dali nilang nasignit kining mga tawhana nga giingong maoy mang-harass sa mga tawo aron adto pabotaron sa mga kandidato sa One Cebu party nga gipanguluhan sa mga Garcia.

Apan taym pa ra gud, aduna kahay konsehal lang sa lungsod o kapitan sa barangay nga maka-kaya og pamayad og ingon kadaghan nga goons?

Dili ko motuo. Aduna gayoy mga dagkong politiko nga nagsugo niining mga tawhana. Dili usab ko motuo nga sa kampo nilang Junjun Davide ug Agnes Magpale gikan ang maong mga sakop sa goons kay One Cebu party man ang sample ballot nga ilang gipangsukipan og kuwarta.

Kana kay sample ballot sa One Cebu party ang gidaladala anang mga tawhana, nagduda ko nga may kasayuran ang kadagkoan sa partido sa mga Garcia sa presensiya nianang mga tawhana diha sa segundo distrito.

Maayong patubagon og una silang Pabling ug iyang anak nga si Pablo John.

* * *

Ang tinago-tago nga alyansa nilang Mayor Jonas Cortes ug Inday Neri Soon-Ruiz gipaabot nga molumpag sa posisyon ni Kongresista Luigi Quisumbing.

Ang Mandaue gitawag sukad pa kaniadto nga “clannish vote” kay hapit tanang lumad niining siyudad mga paryente ug modesider kinsay botohan pinaagi sa desisyon sa labaw sa ilang pamilya. Dinhi nakapabor si Inday Neri tungod kay makahig ngadto kaniya ang clan vote gikan sa kampo ni Jonas nga labaw pang clannish.

Sa akong nahibaw-an gikan sa mga amigo nato diha sa Mandaue, mas pabor usab si Jonas nga si Inday Neri ang mahimong kongresista tungod kay mas interesado kining mahimong “lone district” ang Mandaue. Ug kini maoy kaugmaon nga gilantaw ni Jonas ini’g kapupos sa iyang termino sa 2016.

Kun pasagdan si Luigi, wala kini hikutar nga ma-lone district ang Mandaue, butang nga nakapalagot sa mga Mandauehanon nga nahimo na lang hinuong second placer kay nauna man nga na-lone district ang Lapulapu nga wala gani igdungog nga nagdamgo niini.

Si Inday Neri ug Jonas magkasinabot ra, sitwasyon nga dili sibo sa kang Luigi ug Jonas.

Si Luigi usab ang gipasanginlan sa mga karaan sa politika sa Mandaue nga nakapausab sa kamada sa Liberal Party sa siyudad human kini nagdalidali og panumpa sa LP atubangan kang House Speaker Feliciano Belmonte sa dihang nakita niyang mahimo kining dakong partido sa 2013 ug 2016 nga eleksiyon. Gikasuko kini ni Jonas kay wala siya konsultaha sa pag-ipon ni Luigi sa LP.

Mayoriya sa mga kapitan sa Mandaue anaa ni Jonas. Si Luigi mitipon sa mga konsehal sa barangay aron paatbangan ang mga kapitan. Tungod niini, ang mga kapitan nga nasuko sa gibuhat ni Luigi tua ni Inday Neri.

Hinuon, ang mga taga-Mandaue wala makakita og proyekto ni Luigi gawas nianang kapin sa 50 ka mga multicab nga gipanghatag sa barangay nga didto ra usab gikompra sa kompaniya nga gipanag-iya sa iyang pamilya.