Kasagaran sa mga botante uneducated kuno!

Sa Lunes, Mayo 13 … mopakanaug na kita sa atong hukom. Ato nang masayran kun unsa nga matang sa ugma ang atong itagana alang sa atong lungsod, sa dakbayan, lalawigan ug sa tibuok nasud. Kay lagi, ikaw ug ako man ang magbuot, ikaw ug ako ang mohan-ay ug mopahiluna sa kaugmaon sa atong nasud.

Ingon niini ikaw ug ako pagkagamhanan. Ingon niini pagkabalaan sa atong katungod pagpili. Tiaw moy ikaw ug ako maoy magbuot kun unsa nga matang sa panggobiyerno ang atong puy-an ugma.

Apan, unsa man kining ilang giingon nga kasagaran kono sa atong mga botante uneducated, busa, uneducated usab pag-alagad ang atong pilion. Kun mao kini … wala kitay mapaabot nga maayong sangputan sa eleksyon.

Unsa man usab kining atong nadunggan nga naghitak na ang vote buying? Magpila kono ang mamaligya sa boto atubangan sa political leader nga gitahasan sa pinalitay, pinasikad sa lista nga gisumitir ngadto kaniya sa purok leader.

Kun mao kini, pagkaalaut sa atong nasud … pagkadimalas.  Nganong mag-eleksyon pa man?  Sumaa, pila na ka eleksyon ang milabay sa atong kinabuhi? Nakahimo ba kinig kausaban sa panggobiyerno?

Si Senador Miriam Santiago miingon, atong kutloon: “Those who are not educated for voting are choosing from those who are not educated for serving. The greater majority of the country’s 50 million voters who will troop to the precincts in May are not intelligent … not educated for voting.” Tinuod ba ni? Usa ba ikaw sa buot ipasabot ni Miriam?

Kun mao kini ikaw, ayaw lang unag botar karong eleksyona, kay mag-among-among ka lang sa atong ugma. Atong iangin ang tibuok nasud sa atong pagka-walay hibangkaagan ug pag-negosyo sa atong katungod pagili.

Atong paningkamotan nga tapus ning eleksyona, makaginhawa na ta, ug mahaw-as na kita sa kalisud. Hagit kini sa matag botante. Akong usbon, ikaw ang magbuot kun unsay dangatan sa atong nasud … magmauswagon ba, o magpabiling timawa.

Ikaw ang hari. Ikaw ang magbuot. Let’s prove Miriam wrong. Intelligent ug educated kita nga mga botante. Apan, kun nakadawat ka na, kaylagi nanaginot ka sa pila ka sakong bugas nga imong gibugti sa imong katungod pagpili, paningkamoti nga makagamit gihapon ikaw sa imong konsiyensiya, aron ang katarong ug kaligdong sa eleksyon maoy mopatigbabaw, dili ang salapi ug dili ang atong kaburong ug kadanghag.

Dugang niini, ang Parish Pastoral Council for Responsible Voting mipahimangno: Do not vote for candidates living an immoral life. Strive to understand the issues, platform and programs of candidates. Do not vote for candidates tainted with graft & corruption. Do not vote for candidates simply because of utang na loob, popularity or good looks. Always put the welfare of the country as top priority in choosing the candidates you will vote for.

Lisud ba gud ning buhaton? Think of the country, baby!