EDITORYAL - Kabatan-onan paglaom sa nasud

Husto ang Nasudnong Bayani nga si Dr. Jose Rizal sa pag-ingon “Ang kabataan ang pag-asa nang Inang Bayan.”  Ang kaugmaon sa Pilipinas naa sa atong kabataan karon ug wala sa henerasyon sa ‘nagkilom-kilom.’

Iyahay og pangangkon ang mga kandidato ug partido nga sila gi-endorsar og mga organisasyon o relihiyon kay nagtuo sila nga pinaagi sa hiniusang suporta sa mga miyembro sa maong mga pundok modaghan ang ilang mga botos.

Apan dunay labing dagkong grupo nga wala ma-tap sa mga kandidato. Mao unta kini ang sektor nga dako og impact sa mosunod nga lima ngadto sa walo pa ka eleksyon.

Kini mao ang kabataan.  Sila ang mga bag-ong nagparehistro nga nag-edad og 18-anyos hangtud sa 20-anyos nga wala ma-tap sa mga kandidato.

Kung makombinsir kini sa mga kandidato pinaagi sa ilang maayong plataporma, usa ka lig-ong haligi ang suporta gikan sa kabatan-onan.

Kinahanglan lang mahibawo ang mga campaign managers kung unsaon pagduol ug asa “gitikon” ang kabatan-onan.

Usa niini mao ang internet, mas layo ang maabot kun itandi sa linawas nga pangampanya.

Pipila lang kaha sa mga kandidato ang misagop sa paggamit sa gahom sa online campaigning? Daghang social networking sites sama sa Facebook, Twitter, blogging ug uban pa nga gikabuangan sa kabataan.

Apan angayan usab magmatngon ang mga kandidato, kay pinaagi gihapon sa internet mahimong mosikat ug hangpon ang kandidato.

Pinaagi gihapon niini mahimong maguba ang kandidatora sa usa ka nangambisyon og posisyon.

Ang mga nanggungis nga mga politiko sa panahon karon mao ang mga kandidato nga gisuportahan sa mga batan-on sa ilang panahon.

Dili ikalimod nga daghang mga tiguwang ang sirado na ang huna-huna alang sa reporma ug kausaban.