Ikalimang hilisgutan: Ang proseso sa dili pa himoon ang eksorsismo

11. Pilion ang dapit diin pagahimoon ang Rito sa Eksorsismo. Mas maayo nga kini usa ka simbahan o kapilya nga layo sa mga tawo nga buot lang manguryoso kalabot ning maong isyu.  Kay imbis makatabang makadugang hinuon sa problema kun ang solemneng ritwal mamahimo naman hinuong usa ka sensasyon.  Kun ugaling ang biktima dili makahimo og panaw padulong sa simbahan o kapilya, mahimong himoon ang ritwal mismo diha sa panimalay sa biktima.

12. Kun ang biktima, anaa sa hustong panghunahuna, kinahanglang dasigon siya nga mohimo og personal usab nga pagtahan ug paglaum ngadto sa Dios nga mopalingkawas niya gikan sa kaulipnan sa dautan. Dugang pa, angay nga iyang dawaton ang sakramento sa pagkalawat ingon man ang pagkompisal ug pagpuasa. Ang maong kahimtang niya mahimong makapaaghat pa unta sa biktima sa mas halawom nga pagsalig o pagtuo ngadto sa Dios. 

13. Kinahanglan nga anaa ang Krusipiho  sa duol alang ning maong katuyoan nga itapion uban ang tumang pagtahud ngadto sa ulo o sa dughan sa biktima. Mahimong gamiton usab ang relikya sa mga santos nga gibutang sa reliquary. Paningkamotan sa Eksorsista nga dili kini mapasipad-an sa yawa sa bisan unsang paagi. Dugang pa, dili maayong ipaduol o itapion sa lawas ang Sagrada Eyukaristiya kay basin og pasipad-an lang kini sa yawa.

14. Ang eksorsista dili maayo nga mangutana og daghan o molitok sa mga pangutana nga wala kinahanglana. Dugang pa, dili maayo nga motuo sa isulti sa yawa sanglit siya, bakakon man sugod pa sa sinugdan.

15. Ipunting sa eksorsista kining mosunod nga mga pangutana lamang: Ang ngalan o mga ngalan sa mga yawa  nga anaa sa biktima. Sa unsang paagi sila misulod, kanus-a sila mopahawa.

16. Kinahanglang litokon sa eksorsista ang mga pag-ampo uban ang gahom, pagtuo, ug pagpaubos. Kun ugaling nakita sa eksorsista nga dunay nihuboy o nihubag  nga mga bahin  sa lawas sa biktima himoon sa eksorsista iya kining benditahan o kurusan. 

17. Panid-an sa eksorsista kun unsang pulonga nga iyang gilitok ang nakahatag og dugang kasakit sa yawa. Iya kining balik-balikon uban ang pagkamakanunayon aron silotan ang yawa. Himoon niya kini usa, duha, o tulo ka oras kun kaya pa sa eksorsista o sa biktima.

18. Wala’y katungod ang eksorsista nga mosugyot og tambal o modili og tambal ngadto sa biktima. Hinunoa, bugtong mga doctor lamang ang adunay katungod nga mohimo niini.