Ikalimang hilisgutan: Ang proseso sa dili pa himuon ang eksorsismo

Pahinumdom

F. Ang Kahuyangan sa Yawa

Panid-an kun sa unsang paagi magkaluya ang pagkupot sa dautang espiritu ngadto sa biktima. Kun mamahimong masakitan ang yawa diha sa bendita, nan, gamita kini ug kun ang usa ka pag-ampo nakapahimo sa yawa nga mapintason balik-balika kini uban ang buhing pagtuo sa Dios.

G. Pagpahulay

1. Mahinungdanon kaayo ang pagpahulay sa makadiyot o depende sa kahimtang tali sa biktima ug sa mga sakop sa exorcism team o deliverance team.

2. Sa maong pagpahulay kinahanglang mag-ampo ug maalinggatong mamalandong ang mga grupo alang sa dugang pang mga pagahimoong mga lakang.

H. Duol na ang Kadaugan

1. Masinati kini kun ang yawa mopakita na sa iyang mga katapusang depensa. Dinhi manggawas ang mga mapintason ug mga dili kasarangang mga panghitabo sama pananglit sa levitation , telekinesis  nga gahom. Kun ikapakita na ang labing mangil-ad nga mga panghitabo timailhan usab kini nga ang kaaway nagkaluya na.

2. Pangutan-on sa eksorsista kun unsa ang gibati sa biktima. Kun nakasinati ba siya nga dunay “nigawas” gikan kaniya. O mahimo pud ang paggamit sa mga sakramentales. Apil na niini ang pagpainom og Agua Bendita (exorcised water gyud) ngadto sa biktima ug ang pagtan-aw kun duna ba kini reaksiyon human mainom ang exorcised water .

3. Anaa ang kalinaw ug kalipay sa biktima human sa maong panghitabo. Masinati niya ang tinud-anay nga kagawasan ug kalingkawasan gikan sa bisan unsang yawan-ong pwersa nga kaniya niulipon.

Kun dili pa Makab-ot ang Kagawasan

1. Himoon ang subling paghimo sa pag-ampo alang sa kalingkawasan sa biktima o ang ritwal sa eksorsismo.

2. Himoon ang makanunayong tigom ug pagtuki sa kalambuan sa proseso (evaluation) uban ang Exorcism Team ug sa Biktima mismo aron mas masabtan pa gyud kun asa o unsa ang angayang palamboon o palig-onon.

3. Ang biktima dasigon nga mas paladman pa niya ang iyang kalambigitan ngadto sa Dios, ang iyang kinabuhi sa pag-ampo ug sa iyang relasyon ngadto sa uban. Dasigon usab siya nga mag-ampo alang sa kaugalingong kalingkawasan matag adlaw (daily deliverance prayers) aron mas magkahuyang ang bisan unsang dautang pwersa nga niulipon kaniya. -- Sumpayan pa