Badlongon man gud mo

Dunay mipadala kanako og text message kagahapon, nasiguro ko nga usa kini ka drayber. Nagreklamo kini sa dagko nga silot kun sila madakpan.

Gisukna ko niya unsa kuno ang ipakaon sa pamilya sa drayber kun suspensohon ang lisensya bali’g unom ka buwan. Kun magtarong lang sa pagmaneho, dili man gayud madakpan.

Apan unsaon, bisan anaay karatola nga “No Stopping” magpaugat man hinoon. Misugyot ang maong drayber nga ang pasahero kuno maoy tudloan nga dili mag-atang sa no stopping area.

Ang pagtudlo sa mga pasahero tingali angay’ng himoon usab sa mga drayber nga dili ninyo pasakyon kun anaa sila sa no stopping area. Pagsabot kamo nga mga drayber, apan unsaon nga iya-iya ra man gud kamo og lapas sa balaud.

Ang tinuod, daghan man gud kaayo nga dili motuman og balaud kay gahi lagi’g ulo, pero kun madakpan na, kusog kaayo mohangyo ug magpakilooy.

Kapoy na kaayo nga balik-balikon pa ang pagbatbat kun unsa ang angay’ng himoon kay dili maminaw. Mas maayo nga sakmitan na lang sa lisensya kun masakpan.

* * *

Nalipay ko kay “aksyon agad” dayon ang mga sakop sa City Hall clearing team sa akong reklamo. Nakadawat man gud ko og daghan kaayo nga reklamo kabahin sa pag-abuso sa mga tawo nga anaa nagpuyo daplin sa karsada diha sa Salinas Drive.

Tiaw mo nga ang aseras nga gihimo aron anha unta moagi ang mga tawo gibutangan nila og mga lamesa alang sa ilang negosyo nga mga pagkaon? Tarung ba gud ang ilang pangutok?

Ang mga tawo intawon anha na lang molakaw sa karsada ug kuyaw kaayo kun madam-agan sila og sakyanan. Duna ra ba’y mga tawo nga dili makamao kun unsaon pagdala sa bata.

Kun maglakaw sila sa karsada, ang bata maoy ilang palakwon pabor sa mga sakyanan imbis unta sila nga dagku. Maayo unta og ang Department of Public Works and Highways (DPWH) mopalapad na usab sa aseras diha sa Salinas Drive gikan sa flyover paingon sa IT Park.

Ayaw mo paminaw sa mga tawo nga naghangyo nga lugwayan pa ang pagpatuman sa proyekto. Kanus-a pa man kita molihok, unya na ba kun may mga tawo nga madam-agan diha?

Dili man usab sila papahawaon, igo lang sapsapan ang ilang balay aron mapalapdan ang aseras. Mas nindot nga ang aseras butangan og puthaw nga railings aron dili na sublion sa mga tawo ang ilang pag-abuso sa aseras.

Unya, angay usab nga ang atbang niini nga bahin sa karsada habig sa TESDA, buhatan usab unta og sidewalk kay anaa gihapon sa karsada molakaw ang mga tawo.