Unsay nakapapobre sa atong nasud?

Kining pangutanaha, dugay na kaayo ni. Bata pa ko, nagtungha pa sa elementarya. Hangtud karon nga dugaydugay na kong na-senior citizen, wa pa matubag ang maong pangutana, ug labaw sa tanan, walay nakahatag og solusyon.

Maoy atong pagtuo nga ang EDSA 1, maoy makatubag sa maong pangutana, makasulbad sa mga suliran, ug makahaw-as kanato gikan sa kawad-on. Sayop. Ang EDSA 1 igo lang nga nagpalagpot ni Marcos, apan, atong gibilin ang mga suliran, atong gipalambo ang corruption – ug natural, misamot kitag ka-ut-ot. Ngano man?

Si Fr. Jerry Orbos SVD, nagkanayon: “Problems can petrify us or transform us. Problem can imprison us or help us grow and move on.” Ang problema makapahugno kanato ug makapatig-a sa atong kasingkasing o makahatag kanato’g kahigayonan paghimog kausaban sa atong kaugalingon.

Mahimo nga makapabilanggo ug makapa-hostage kanato, hangtud nga waa na tay mahimo, di na makalihok, o makadasig kanato pagpadayon sa unahan. Duna siyay mga sugyot unsaon pagbuntog sa mga suliran , ug unsaon pag-move on. Ato kining sutaon sunod natong lindog.

In the meantime, usa sa makabuntog sa mga problema mao ang gugma. Hinoon, kun magpabilin kini nga pulong lamang, dili kini gugma. Unsa may gugma, alang kanimo? Ania, gikan gihapon ni Fr. Orbos:

“Love is patient. Love is kind. Love is not jealous (niay uban gumikan sa subrang ka-seloso, maghikog; ang uban mopatay). Love is not pompous. Love is not inflated. Love is not rude. Love does not seek her own interests.

“Love is not quick tempered. Love does not brood over injury. Love does not rejoice over wrongdoing but rejoices with the truth. Love bears all things. Love believes all things. Love hopes all things. Love endures all things.”

Mao ba ni ang imong gugma? Nganong ordinaryo na man kaayo karon ang panagbulag sa magtiayon – labi na sa mga artista ug mga politiko? Nganong ordinaryo na man kaayo karon ang pagpuyopuyo ug civil wedding – waa nay labut ang Ginoo sa kaminyuon. 

Gani ang Kongreso naglaraw man nga i-legalize na ang diborsiyo dinhi sa atong nasud – kay alang nila, mao kini ang bugtong sulbad sa mga badlongon nga bana ug asawa. 

Nganong pobre ang atong nasud? Unsa may nakaingon niini. Ngano nga hangtud karon, waa pa may nakita nga kasulbaran? Kadaghan na ta mag-ilis-ilis og presidente … pobre lang gihapon ta. Nagpulipuli ang mga gobernador, mga mayor ug mga barangay captain … pobre lang gihapon ta. Ngano man ni?

Sa sunod natong lindog, ato ning suwayan pagtubag nga pangutana. Of course, di ta mo-attempt paghatag og kasulbaran sa atong ka-pobre. Kay kinsa man tang mosulbad sa atong kawad-on … waa man gani sila makasulbad nga ka-maayong laki nila,  kita na hinoon?

Perhaps atong matubag ang maong pangutana … apan ang pagsulbad would be another story. In the meantime, magsinigaay lang una ta sa atong mga mata.