Taphaw nga balaud

Gibaraw sa Commission on Elections ang kandidatura ni Cebu City north district Councilor Agustus “Jun” Pe didto sa south district. Kini nagpasabot lamang nga dili kadagan si Pe atol sa piniliay karong Mayo.

Sa desisyon sa Comelec, wala maka-establish og kapuy-an si Pe sa south district hinungdan nga dili kini makadagan sa umaabot nga eleksiyon. Wala hatagi og importansiya sa komisyon ang pangangkon ni Pe nga molupyo gayud siya sa sitio Banawa sa Barangay Guadalupe.

Sa iyang pagka-disqualified, matud ni Pe nga mo-file siya og motion for reconsideration. Iya gyud kuno nga pamatud-an sa komisyon nga molupyo siya sa south district ug nga lehitimo gayud ang iyang kandidatura.

Hinuon ato lamang nga paaboton kun ikonsidera ba sa Comelec ang iyang mosyon. Ug kun i-reject gayud kini with finality sa komisyon, siguradong impas gayud ang ambisyon ni Pe nga mag-konsehal sa south district.

Apan ang wala masabti sa tanan mao nga nganong wala kuno hatagi og gibug-aton sa komisyon ang petisyon nga nagkwestiyon sa pagdagan pag-usab ni Pe bisan pa man sa ikatulo na niini  nga termino.

Gidid-an na sa balaud si Pe pagdagan sa north district tungod kay naa na man kini sa iyang ikatulo ug katapusang termino. Apan aron lagi pag-eskapo sa balaud, mibalhin siya pagpuyo sa south aron kuno makadagan pag-usab sa konseho sa rason nga lahi na man kini nga distrito.

Hinuon walay klarong linya ang balaud niining mao nga isyu. Mora’g midapig ang komisyon kang Pe sa isyu sa iyang pagbalhin aron pagdagan. Ang sayop lamang kuno ni Pe mao ang wala niya pag-establisar og permanente’ng pinuy-anan sa south.

Apan kun, sa iyang mosyon, makumbinse gayud ni Pe ang komisyon nga nakab-ot niya ang requirement sa iyang residensiya, nan puwede pang ma-reverse sa Comelec ang nauna nang desisyon niini.

Sa ingon niini, puwede pang makadagan gayud si Pe didto sa south alang sa konseho. Nan kun mahitabo kini, mapamatud-an gayud nga grabe ka taphaw sa atong balaud.