Way molabaw sa balaud

Kinahanglan motuman si Gob. Gwen Garcia sa suspension order nga giluwatan sa Malacañang batok kaniya. Dili siya magdiki-diki sa pagkanaog nga mangita pa siya og tusik. Bisan unsaon paghunahuna wala nay kapuslanan ang iyang pagpanghawid sa lingkoranan kay dili na man siya makapirma sa mga dokumento ug sa uban pang mga transaksyon sa Kapitolyo. Way molabaw sa balaud. Tinuod masakit ang balaud, apan pagkatam-is bang tumanon sa balaud.

Miabot na ang iyang kinutoban. Mapait nga Pasko alang kaniya, kay nanuktok sa iyang pultahan ang pamaskong suspension order. Giingon nga dili kuno makiangayon ug wala magsubay sa kristiyanismong pagtuo kay giatol gyud sa Pasko. Kay ngano? Ang pagpakanaog og suspension order nag-agad ba’g panahon takna ug adlaw?

Bisan kanus-a, bisan kinsa, bisang asang dapita ang balaud dili moila   si kinsa ka man nga gamhanan kun namatud-an siyang sad-an. Kinahanglan ang balaud mopatigbabaw gayod alang sa tanan kabos man o adunahan.

Busa angay magmatngon dili lamang ang mga ordinaryong tawo, ilabi na gyud kadtong naghupot og katungdanan sa atong gobiyerno nga dili magpaturagas sa paggamit sa ilang gahom nga gihatag sa katawhan, kay kanang gahoma adunay kinutoban ug dili kini magdayon.

Hinumdomi si Pres. Ferdinand E. Marcos. Hilabihan ka gamhanan ug poderoso kaayo sa iyang panahon. Apan unsa may iyang gidangatan? Napalagpot siya sa katungdanan pinaagi sa people power. Wala’y nagtuo nga mahugno ang iyang administrasyon.

Ang pagka-hugno ni Marcos, way kalainan sa pagkalumpag sa diktadorya ni Anastacio Somosa sa Nicaragua. Maayo man gani kay unom ra ka bulan nga suspension ang gipahamtang kang Gob. Garcia. Sakto sab kay unom na man lang ka bulan ang nahibilin sa iyang termino nga matapos unya sa Hunyo 30, 2013 sa udtong tutok.

Maoy paga-ingnon nga wala siya makaabot sa pungkay, ang pagkab-ot sa kataposang hunat sa iyang termino kay natagak...natagak ug natagak gayod nga walay TRO nga naka-sapupo.

Matud pa ni Acion Lord:  “All power tends to corrupt, and absolute power corrupt absolutely.”