BANAT EDITORIAL - Ang pabuto sa bag-ong tuig

Nahimo na nga tradisyon sa  mga  Filipino ang pagpabuto sa pagsugat sa bag-ong tuig kay gisunod ang pagtulun-an sa mga Pagano  nga ang  pagpabuto  kuno  sa  mga panahon  sa dagkong kasaulogan maoy  pag-abog sa yawa.

Busa panahon sa kasaulogan sa ilang  pista, uban pang  mga kasaulogan  ilabi na  sa pagsugat sa bag-ong tuig naanad  na  sila  nga magpabuto  aron  kuno mobahag ang ikog  sa yawa  sa kahadlok.

Kay ang  mga  Pagano kaniadto nagtuo nga ang yawa sama sa iro, baka, kabaw, iring  ug  uban  pang  klase  sa hayop  nga  makadungog gani og buto-buto manago  ug mobahag ang ikog  sa kahadlok. Apan timan-i  nga  inighuman  sa buto-buto  magsayaw-sayaw usab sa kalipay ang  maong  mga  mananap nga kun maoy  gibasehan sa mga Pagano sa ilang pag-uso-uso  sa  pagpabuto  nga mahadlok  ang yawa, wa sila masayud  nga  mas wise pa ang yawa  kay sa  mga  mananap.

Ang yawa wa gani maikog  ug mahadlok  mismo  kang Cristo  dihang  gidala  niini  ang anak sa Dios  sa taas  nga  bungtod  ug gisugo kini  nga paambakon kun tinuod Siyang anak  sa Dios  kay sapnayon  Siya  sa Dios  ug  di Siya  mamatay. Apan  si Cristo nga  mas  wise pa  kaniya igo lang siyang giingnan   nga ilara  ang  mga  Pagano tets, ayaw ang anak  sa Dios kay nahisulat na, magsimba ka sa Dios lamang ug di kay  sa mga  binuhat  niini.

Mao bitaw tingale  nga kun kanus-a mikusog  ang  pabuto  sa matag  panahon  sa pasko  ug bag-ong  tuig  misamot  na  ang  kaisog  sa yawa  nga mimugna  og  mga  katalagman matag  tuig. Gikan  sa pagkusog  sa illegal  drugs  dinhi  sa nasud  nga  nakapakusog  sa krimen  matag  tuig  gikan sa rape, tulis, kawat ug uban  pang  kriminalidad, nabaniog  usab  ang  kausaban sa lakaw sa panahon  kun  climate change nga  misangpot  sa gitawag  nga  global warning ug uban pang matang  sa kadaotan  sa  kalibotan.

Karon lang  tuiga, human sa pagsugat sa bag-ong tuig niadtong Martes, diin  ang  nagpaka-paka  nga pabuto di lang mugna sa firecrackers  kundi  bisan  sa mga armas de fuego  ug  namatyan  og  pipila  ka tawo kay  nasabak  sa saag  nga  mga  bala, gisubhan  dayon ang  nasud og  usa  ka dugoong hitabo  diin  pito  ang  patay ug 11 ang angol sa masaker  didto  sa Kawit,  Cavite  niadtong  Biyernes, Enero 4 kansang tinubdan sa krimen giingong tiggamitan og gidiling drugas.

Angay natong  masayran nga sa mga dautang  panghitabo magpista sa kalipay ang yawa, busa hain naman ang giingong  mga buto-buto  niadtong bag-ong tuig  nakapabahag sa ikog  sa yawa?

Kanus-a pa ba ang tawo mohunong sa pagsunod sa pagtulun-an  sa mga  Pagano? Ang grupo sa mga  tawo  nga wa mag-alagad sa Dios nga matuod kundi  sa  mga binuhat sa Dios.