Pastilan uy!

Ang mga karsada mahimo man nga siradohan kay gamiton sa lain nga katuyoan apan dili kini basta-basta kun walay pagtugot gikan sa konseho sa dakbayan o kaha lungsod.

Apan naunsa ba nga kaniadtong Biyernes sa hapon hangtud sa gabii, gibabagan man ang Lopez Jaena Street unahan og gamay sa Ramon Aboitiz building? Walay labot ang Aboitiz niining maong binuang, apan gihimo lang nako nga reference point ang maong lugar.

Anaa gud ko sa konseho sa dakbayan mag-cover kanunay ug wala ko makabantay nga dunay pagtugot nga sirad-an ang maong karsada. One-way ang Lopez Jaena Street gikan sa Parian paingon sa MJ Cuenco Avenue.

Diha ko miagi paingon unta sa MJ Cuenco apan nakurat ko kay duna may tulda ug daghang lingkoranan nga gibutang sa karsada. Duna pay pipila ka tawo nga nag-inom og beer, mao nga dili maagian.

Miliko ko sa wala subay sa gamay nga karsada paingon sa Bonifacio Street, apan one-way man ang Bonifacio Street gikan sa MJ Cuenco Avenue. Miliko na lang ‘sab ko balik paingon sa Sikatuna Street.

Gitawag nako ang CITOM ug giteksan si Mayor Mike Rama, apan batasan na sa atong mayor nga pwerteng dugaya motubag. Mibalik ko didto sa gisirad-an nga karsada. Dunay polis nga nagbantay, akong gipangutana ug nasayran nako sa Waterfront PNP Station siya na-assign.

Nakita nako nga may minatay diay diha sa balay nga nahimutang daplin sa karsada. Gitawag ko sa radio operator sa CITOM ug gipahibalo nga gisirad-an ang karsada kay pangadye sa namatay nga polis.

Pastilan, kun dili kalikayan nga ang mga mosabat sa pangadye moabut sa karsada, binli og usa ka bahin sa karsada nga kaagian sa mga sakyanan. Gamita ‘sab tawon ang inyong utok uy ug pagbaton og kaikog nga makahasol mo sa mga motorista.

Kamo ‘sab diha sa CITOM, siyaro og wala g’yuy inyong mga sakop nga nakaagi sa maong lugar? Kapila na g’yud ko makabantay nga ang mga binuang diha sa karsada pasagdan lang sa mga traffic enforcers.

* * *

Matud ni Mayor Michael Rama nga dili kwestyonable ang paggasto niya og tunga sa milyon ka pesos aron pagpalit og litson kay gipanghatag man niya kini sa mga barangay ug mga grupo nga naghimo’g kalihukan.

Ambot og public activity ba g’yud kaha ang tanan kay dunay dukomento nagpakita nga apil sa nahatagan og litson mao ang Gabutan Clan diha sa Guadalupe. Klarohon nako nga makapalit og litson ang Gabutan Clan, apan kun ngano nga sila gihatagan, ambot kun ngano.

Gikan sa Enero hangtud sa Nobiyembre 30, si Mayor Rama migasto og P422,600 alang ra sa litson. Sa ato pa, kun tag P5,000 ang matag litson, dul-an sa 100 ka litson ang iyang gipalit. Pun-an pa karong panahona nga daghan kaayo siya’g gipanghatag sa mga barangay nga nag-party, lapas na tingali sa tunga sa milyon ang gasto