Opisyals sa customs nakig-kombuya sa mga smuggler?

(Una sa duha ka hugna)

Sigun sa alert orders nga gipirmahan ni Cebu Customs District Collector Ronnie Silvestre lima ka mga 20 footer vans ang naka consigned sa Muramoto ug ang laing lima sa Mobilia. Kining Muramoto manghimoay og TV ug radio receivers, sound ug video recording samtang ang Mobilia usa ka furniture and houseware manufacturer nga pulos anaa mahimutang sa Mepz 1 sa dakbayan sa Lapu-lapu.

Ang napulo ka 20 footer nga container vans naabot kini sa Cebu International Port kaniadtong Nobyembre 22 luwan sa MV Titan nga gikan sa Thailand. Ang lima sa napulo ka container vans nakalusot na sa mga kamot sa Bureau of Customs sa dihang nadiskobrihan ang nahabiling lima ka mga container vans. Ang X ray inspection team nagduda sa vans dihang ilang namatikdan ang kadudahang mga customs personnel nga nakadistino sa Mepz nga may dala nga overtime clearance nga pirmado ni deputy customs collector for operation Ahmed Erpe bisan pa man sa kalawom na sa kagabhion (11pm). Kini ang hinungdan sa mga personnel sa X-ray inspection project sa Sugbo sa pagpaubos sa mga container vans sa x-ray machine ug dinhi ilang nasayran nga lahi ang kargamentong sulod sa container vans kay sa gideklarar sa mga papeles o import entry.

Ang Muramoto sa ilang import entry mideklarar nga mga plastic para sa paghimo nila og mga eye glasses ang sulod sa container vans samtang ang Mobilia mideklarar nga mga marble ug granite ang sulod sa ilang container vans apan ang nakita sulod sa x-ray mga sinakong asukar diay.

Gumikan sa x-ray inspection result gipirmahan ni Cebu Customs Collector Ronnie Silvestre ang alert order nga giandam sa X-ray inspection project team ug mimando sa Customs police sa pagkonpiskar sa lain pang lima ka mga container vans nga nakatago na sa bodega nga gipanag-iya sa Greenhills Product Inc. nga nahimutang sa dalan Asahi, Kasuntingan, Mandaue City pero duha na lang sa lima ka mga container vans ang na-recover human mipagawas og kamandoan ang hepe sa Customs Police nga si Camilo Cascohan sa dili paghilabot sa nahabiling tulo ka mga vans diin ang usa niini gituohan nga nahabwa na ang kargamento niini.

Ang duha sa tulo ka mga container vans naguyod ra gayod pagbalik sa Cebu International Port pero dili na kini ang mga orihinal nga vans samtang ang usa nawagtang. Una niini, ang legal department sa Bureau of Customs mitambag kang collector Silvestre sa pagdala pagbalik sa mga container vans sa bodega sa Cebu International Port aron dili kini mailisan o makawatan apan ang tambag sa legal department gisupak ni customs police chief Camilo Cascolan kinsa maoy gipaboran ni collector Silvestre kinsa mipagawas usab og Warrant of Seizure and Detention (WSD) nga gihulagway sa mga customs practitioners nga depektoso nga posibling maoy sudlan sa mga abogado sa mga smugglers aron sila makalingkawas sa kaso.