Nukos-nukos
Gipasabot sa kandidato sa Liberal Party pagkagobernador, Hilario Davide III, nga wala siya mamasangil og bisan unsa nga kahiwian batok nila ni Gobernador Gwen Garcia ug sa igsuon niini nga si kongresista Pablo John Garcia dihang iya ning gihagit nga ablihan ang ilang mga bank accounts aron pagpakita sa publiko nga wala silay gitagoan.
Matud ni Davide nga bugtong niyang tumong sa hagit mao lang ang pagsukod unsa ka transparent ang managsuon.
Ang katin-awan gihimo ni Davide human mibahad ang kampo sa mga Garcia nga mopasaka og kaso batok niya.
Tataw nga nahadlok si Davide sa bahad hinungdan sa paglubad sa iyang pamahayag.
Tataw nga ang iyang pagpanghagit nga ablihan ang mga bank accounts sa mga Garcia usa ka matang sa "indirect" nga pamasangil sa pangurakot.
Kun dili pamasangil ang iyang tuyo, unsa man? Transparency? Nganong bank accounts man gyud nga pribado man ni nga butang? Kun buot si Davide og transparency ang mga transaksiyon sa Kapitolyo maoy angayan niyang bantayan.
Isip abogado nasayod siya nga dunay balaod nga nagpugong niini.
Ug kun nagtuon siya sa iyang balaod nasayod sab unta siya nga iyang obligasyon ang pagprobar sa iyang pasangil.
Dakong insulto sa iyang amahan nga kanhi chief justice ang iyang gipakita nga kaignorante sa proseso.
Kun nagtuo si Davide nga nangurakot ang mga Garcia sa ilang katungdanan angayang iyang ikiha ug ipakita ang iyang ebidensiya ug dili kay balihon ang proseso.
Kun matinud-anon siya ug transparent nganong dili man niya angkunon nga iyang pamasangil ug direktang himuon batok sa mga Garcia? Dili maayo nga kalidad sa usa ka tawo nga nangambisyon nga mamahimong lider sa probinsiya ang batasan nga magnukos-nukos.
* * *
- Latest
- Trending
