Bintana sa panimalay gisampungan sa silingan, mamahimo bang ipatangtang?

Ang atong balaod naglatid sa atong mga katungod lakip na sa atong mga kabtangan. Kun ikaw nanag-iya og usa ka butang o property ang balaod nagprotihir kanimo alang sa paggamit ug pag-enjoy sa imong propiedad. Apan kun adunay mga tawo nga mohimo og mga lakang o motukod og bisan unsang struktura nga makababag o makapugong sa imong katungod sa paggamit sa imong property unsay maayo nimong buhaton? Kana nga pangutana ang atong tubagon karon sa atong column.

* * *

Dear Atty. Divine,

Maayong adlaw kanimo Attorney. Misuwat ko nimo tungod sa akong problema nga nakahasul gyud kanako. Ang akong balay tulo ka andana, unya tungod kay sikit-sikit man ang mga panimalay dinhi sa syudad, ang bintana sa akong building anaa natungod sa gate sa balay sa akong silingan apan wa ni problema kay dili man taas ang iyang balay. Mitumaw ang akong problema attorney sa dihang ang akong silingan nagbutang og plywood tungod sa akong bintana unya iyang gibutangan og poster hinungdan nga natabunan ang akong bintana ug dili na makalusot ang hangin ug ang kahayag gikan sa gawas kay didto man gyud niya gipatungod ang iyang gibutang nga plywood nga adunay poster. Wa man mi mag-away sa akong silingan apan tungod sa iyang gibuhat nga iyang gituyo pagsampong ang akong bintana dili na gyud susama kaniadto ang among relasyon isip manag silingan. Ang akong pangutana Attorney kun mamahimo ba ko nga mopatangtang nianang iyang plywood nga nakasampong sa akong bintana? Unsa may maayo nakong buhaton?Hinaut nga imo kong matabangan sa akong problema. Daghang Salamat.

— Lita

* * *

Dear Lita,

Salamat sa imong pagsuwat sa Legal Corner. Kun gusto nimong ipatangtang kanang plywood nga iyang gibutangan og poster nga maoy nakasampong sa bintana sa imong building mamahimo ka nga modangop una sa inyong Barangay Kapitan, mopasaka ka og reklamo batok sa imong silingan aron kamo mag-atubang ug mapangitaan og solution ang imong problema. Basi sa atong balaod, naa man tay gitawag nga EASEMENT OF LIGHT AND VIEW, kanang Easement of Light ang tumong niana nga dili masalipdan ang usa ka gamay’ng bintana sa building aron makalusot ang kahayag ug ang hangin gikan sa gawas ug kanang Easement of View nga dili dapat tukuran og bisan unsa nga butang nga makasalipod sa view sa usa ka property. Aduna pay laing gilatid ang atong balaod sa Article 694 sa Civil Code nga gitawag og Nuisance kun pananglitan ang pagtukod sa usa ka struktura gitumong gyud sa pagsalipod sa imong property og tungod niini nalimitahan na hinuon ang imong paggamit sa imong property mamahimo na nimong kabasihan sa pagpatangtang. Daghang paagi pagsulbad sa imong problema apan mas maayo nga adto ka mag-una sa pagpakigsabot ug pag-areglo niini gawas sa Korte aron dili mo mahasul. Hinuon kun dili gyud maresolbar ang imong reklamo mamahimo kang modangop og abogado aron iyang matun-an ang imong kaso sa mga legal nga lakang nga angayang pagabuhaton. Hinaut nga akong natubag ang imong mga pangutana. Thanks and God Bless.

— Atty. Divine

Alang sa inyong pangutana, ipadala lang sa Legal Corner sa Banat News or email sa [email protected].