Dept heads sa Lapu mga high-tech na

Kuyawa na gyud ning dakbayan sa Lapulapu, puwerte naman ka-high tech! Niadtong Lunes, nag-training ang mga department heads sa City Hall sa Lapulapu unsaon paggamit sa mga IT gadgets, ilabi na kining mga Android devices, pagpapaspas sa ilang trabaho.

Mismo sa opening program sa training nga gihimo sa Crown Regency sa Lapulapu, si Mayor Paz Radaza nagbasa sa iyang speech diha sa iyang Samsung Galaxy Tab.

Sumala pa ni Mayor Paz nga bisan senior citizen na siya, proud kaayo siyang mipahibalo nga naggamit siya og iPad ug iPhone.

Ang training gitumong pagtudlo sa mga department heads paggamit sa Android devices sa survey and research, diin dili na sila mogamit pa og papel ug lapis tungod kay mahimo na nila ideretso og tuplok sa ilang Tablet ang data nga ilang mahipos gikan sa mga konstituwente nga respondents.  Ang dakbayan sa Lapulapu pa ang local government unit nga akong nahibaw-an nga mihangop sa digital media diha sa ilang mga trabaho. Ug mismo ang mayor nila maoy nag-una aron sundon usab sa iyang mga department heads.

Maayong sundon sa uban nga mga LGUs kining gibuhat sa Lapulapu karon nga dili na mapugngan ang pagsulbong sa information technology pag-usab sa dagan sa mga opisina sa gobyerno.

Niining paagiha makadaginot na sa papel ug tinta ang LGUs unya dili na usab bug-at ang trabaho tungod kay kining mga Tablet puwerte ra man kagagmay ug kagaan nga mahimo ra makumot sa kamot.

Dili man tingale maguol ang mga department heads sa paghangop sa digital media bisan unsay ilang edad. Sama kini sa pagsugod sa Automated Teller Machine (ATM) kaniadto diin ang mga tigulang kinahanglan pa abagan pag-withdraw og kuwarta, karon dili na. Kun sugdan nila karon pagtuon ang Galaxy Tab, iPad ug uban pa, dili pa ulahi ang tanan.

Ang ato lang likayan o hinayhinayan ang games kay usahay mao kini ang makapalangay sa atong trabaho. Biktima usab ko niini.

* * *

Kinahanglang ayuhon sa mga Garcia unsaon pagtimon ang isyu sa Balili property kay basin og mao kini ang moguyod nila sa panpang sa kapildehan.

Ang mga tawo sa lalawigan sa Sugbo nagminaro na karong mga higayona nga bisan sa bisan unsa na lang ang gipang-apod-apod sa Kapitolyo (insurance, kanding, bugas ug uban pa), nakapilit gihapon sa ilang hunahuna ang kabuang ni Gob. Gwendolyn Garcia sa Balili property, wala pay labot ang  kontrobersiyal nga Cebu International Convention Center (CICC).

Mao kini giingon nga dawaton ang paon, iluwa ang taga!