EDITORIAL - Ang pagsumpaki sa mga doctor ug taga media

Kinsa may tuohan  sa publiko  bahin  sa  mga food supplement  nga  way therapeutic  effect  o  di makaayo  og  sakit?...  ang  doctor  o  ang  taga  media?

Kini  ang  kasagarang  pangutana  sa publiko nga  naglibog  bahin  sa mga  mitumaw  nga nagkadaiyang  klase  sa  mga  baligyang  food supplement  sa  mga tindahan  karon   nga   gimarkahan  sa mga otoridad  sa Bureau of Foods and Drugs (BFAD)  og “No Therapeutic Effect.”

Kun  ang  mga doctor  maoy  pangutan-on lareno  kaayo silang  motubag  nga  di  ug di gyud  makaayo  og  sakit  sa tawo   ang  maong  suplementong pagkaon  kay  di man  kini  tambal.

Apan kun maminaw  ka sa  mga radio (gawas  sa way advertisement niini) makabaton  ka og kaikag  pagpalit  sa  mga  food supplement  nga  ibandilyo  niini  sa kahanginan  gumikan  kay  patabanan  man  usab  og  mga pamatuod .

Pinaagi  sa paggamit  og  mga tawo  nga  konuhay  kanseron  ug maoy mo-promote   sa ngalan  sa food  supplement nga ibandilyo  sa radio  ug   mopamatuod  kunohay  nga  puwerting  pagka-ayoha    sa iyang  sakit  nga kanser, hesus,  maglumba  baya  og  palit  ang  mga tawo  ngadto  sa tindahan  nga maoy   gipasigwar  nga namaligya  sa maong baligya.

Kun  ang  mga doctor  pangutan-on  nganong usahay  may  food supplement  man  nga  makatayming  usab  nga makaayo  sa masakiton  nga motomar  niini, ipatin-aw  sa doctor  nga  kun  ang  usa  ka masakiton  kansang  balatian  wa  pa  sa gitawag  nga  kritikal,  aw  natural  kun  mosubad  kini  og  mga luwas  nga  pagkaon  nga di kontra  sa iyang  sakit,  mobahar  gyud  ang  kalawom  sa iyang  balatian  ug  maiban-ibanan og  dyutay  ang ka-grabihon  niini.

Apan  di buot ipasabot  nga naggumikan sa food supplement  nga  iyang  gitomar  kay  ang tinuod  di man tambal  ang  maong  mga  suplemento.

Dinhi maong aspeto,  mas otoridad  manulti  ug angay  tuohan  ang  mga  doctor  kinsa  nag-estudyo  og  tagpila  ka tuig  bahin  sa medisina  sa ilang  pamahayag  bahin  sa mga food supplement  itandi  sa  magsisibya  sa radio  nga way hanaw  bahin  sa medisina  unya  kusog kaayo  molingla  sa publiko  bahin  sa gi-promote  niyang food supplement.

Hinuon kinsa  bay mailad  kun  way  magpailad.