Usa sa labing importante nga hiyas sa atong pagkatawo mao ang pagsulti. Kini may dakung kapuslanan nga mapakita nato ang katakos nga mapadayag ang kaugalingon.
Pinaagi niini, makamugna kini’g gahum o impluwensya, nga makaayo o makadaot magdepende sa kapasidad sa nagsulti. Ang pagsulti maoy mohubad sa dugokan sa pagpasabot aron magkasinabtanay. Apan may higayon gihapon bisan nagsultianay na wa magkahiusa sa tumong kay wa kasabot.
Sagad sa mga tawo nga maayo mopasabot, maayo kana og abilidad sa pagsulti. Wa kini mag-agad og dako’g grado o may natapos nga kurso. Daghan na kita’g nasinating nahimong gamhanang tawo sa kalibutan tungod sa inherent, authoritative o elective nga posisyon apan way abilidad sa pagsulti, di ba?
Hinoon kitang tanan makahibalo man sa pagsulti. Ang problema lang kun unsaon paghan-ay nga sayon masabtan sa naminaw aron sila mamati nga may kaikag molahutay sa pagsabot.
Aron ka epektibo sa pagsulti, magpraktis ka atubangan sa salamin, paminawa kun nakasabot ba ang imong kaugalingon. Mangita kag paagi nga sa pagsugod pa lang madani nas pagpaminaw kun unsay buot niyang tugkaron sa imong gipanulti. Mag-anad ka sab sa pakighinabi ni bisan kinsa aron madebelop ang kompyansa mo sa pagsulti.
Di na kinahanglang magmemorya, kuhaa lang ang punto o dugokan sa storya. Mag-anad ka sab sa pagpaminaw sa uban nga maayo manulti, obserbahe ang istilo o teknik kun giunsa pagsugod o gipadayag ang katibuk-an sa estorya.
Unya imo sad aninawon ang namati nga ihaom ang lebel sa pagsabot, nga i-agad mo nga dali ka masabtan. Madugayan nga makat-on ka niani, mas mouswag nga may kahanas ka na makakombinsi og tawong mamati sa imong mga gipanulti.