EDITORYAL - Ang mga politikong hakog ug way kaluoy sa mga eskuwater

Ang mga politikong hakog  maayo kaayo molingla  sa  mga tawo aron mo-bilib kanila nga  maayo  silang tawo, maluluy-on  ug itudlo sa tawo  ang tinunto aron patuohon  sa ilang  maayong liderato.

Kay ang politiko  nga tarong, ug di hakog, kaantigo motudlo  og tinarong sa tawo ug  mahadlok motudlo og tinunto ilabi na ngadto  sa mga tawong inosente.

Kasagaran sa  mga  kabus  ug inosente  pa sa balaod, dali kaayo motuo  sa tinunto nga itudlo  sa mga  politikong  hakog.

Busa  sa kaulahian,  ang  mga  kabus nga inosente nga may pagkahakog  usab  maoy mabitik  sa mga  politikong  hakog ug  maoy makaluluoy  sa  umaabot  nga  mga adlaw.

Sama niining  mga eskuwater  karon  nga biktima  sa mga tinunto  sa  mga politikong hakog.

Ang mga  politikong  hakog bisan nasayud na sa balaod  nga ang  yuta sa goberno di papuy-an og  mga eskuwater,  apan  sila mismo  ang  sekretong  misurambaw sa maong balaod. Bisan  kun nasayud  sila  nga supak  sa balaod  ang  pagpapuyo  og  mga tawo  sa yuta  nga  iya  sa goberno, apan tungod kay  hakog  ug nagdungayop  sa boto  sa maong  mga tawo, mao pay  mopataud  og  suga ug tubig  sa mga  eskuwater aron patuohon  nga maayo  ang  iyang  gibuhat.

Ang  mga  politikong  hakog nasayud  nga temporary ra kaayo  sila  sa ilang katungdanan , busa  linglahon  nila  ang tawo, total  inigkawagtang  nila  sa ilang katungdanan, ang mopuli man kanila  maoy  magsakripisyo  pagpapahawa  sa  mga eskuwater  gikan  sa yuta  sa goberno  ilabi  na  kun gamiton na  sa kagamhanan  ang maong yuta.

Ang  mga kabus  usab  nga inosente  ug nalingla  sa politikong hakug, aw mosaway  na  ug mosukol  na  sa mga politiko  nga  mopapahawa  kanila  gikan  sa yuta  sa goberno  nga  ilang  gipuy-an  ug  ang maong  politiko  nay isipon nilang dautan.

Busa  ang tarong  politiko di lamang nimo makita  sa mga tag-as og katungdanan  kundi magsukad sa mga politiko  sa barangay  nga motudlo ug mobadlong  sa  mga  tawong  buot  mo-eskuwat  sa yuta  sa goberno  nga anaa  sa ilang hurisdiksyon ug di kay mopadasig na hinuon kanila  aron  mahimong makaluluoy  ugma  damlag.