Ang Kasambahay Bill

Ang Kasambahay Bill, ang balaudnon nga misaad og daghan ang benepisyo sa atong mga katabang sa panimalay, wala pa gihapon makalusot sa Kongreso. “Kasambahay Bill Hits Snag Anew,” matud pa sa headline sa balita bahin niini.

* * *

Kining Kasambahay Bill dugay nang gilumluman sa atong mga magbabalaud diha sa Senado ug Ubos Balay Balauranan. Gipanday kini mga 18 anyos na. Hangtud karon hanap pa sa diyes panas ang kaugmaon niining maong balaudnon.

* * *

Gihisgutan nasab kining Kasambahay Bill tungod tingali kay nagsugod naman sad ang kainit sa piniliay nga gitakda unya sa Mayo, 2013. Libuan ang mga kasambahay kon mga katabang sa panimay ang interesado niini.

* * *

Kun mahimo nang balaud kining Kasambahay Bill mamaayo na ang kahimtang sa mga katabang. Modagko na ang mga suweldo ug daghan nang mga benepisyo nga ilang madawat.

* * *

Pananglitan ang mga maid kon katabang didto sa Metro Manila makadawat og basic salary nga P3,000 matag buwan ug kadtong naa sa first class municipalities ug chartered cities makadawat og P2,500. Ang basic pay sa mga katabang sa uban dapit sa nasud, P2,000 labing menos ang suhol.

* * *

Kini gawas sa mga benepisyo sama sa limitasyon sa oras sa trabaho, bakasyon nga dunay bayad (vacation with pay), membership sa SSS, Philhealth ug uban pang ahensya sa gobyerno, hospitalization, etc., etc.

* * *

TRIVIA. Maayong buntag sa atong mga higala diha sa Samboan ug Santander. Daghang salamat sa inyong nagpadayong suporta sa Banat News.