Nagyagaw’ng mga huhungihong

Duha ka bersiyon sa giingong sekretong pagpatambal ni Kongresista Tomas Osmeña ang akong nadunggan. Ang una gikan sa mga suod ni Mayor Mike Rama. Ang ikaduha gikan sa mga suod ni Osmeña. Wa koy paagi sa pagtino kinsa ang namakak. Nagduda hinuon ko nga ang duha ka pundok way tinguha pagsulti sa lunsay nga kamatuoran. Gibahaan ko og text messages mahitungod sa giingong sakit ni Osmeña sa niaging duha na ka semana. Wa ko magtagad hangtod nga nakasulti sa niaging semana ang usa sa mga suod ni Rama nga hingpit nakong gisaligan.

* * *

Ang sinugdanan sa ilang sugilanon giingong gikan sa drayber ni Osmeña nga taga Barangay Ermita. Nanulti kuno siya sa mga silingan nga dihang iyang gihatod si Osmeña sa Mactan Cebu International Airport, nag-agulo ang kongresista sa labihang kasakit. Wa na sila mosulti kinsay tinubdan sa sumpay: Nga si Osmeña gidid-an pagsakay sa iyang international flight tungod sa tandugon nga kahimtang sa iyang panglawas; maong nisud si Osmeña sa St. Luke’s Medical Center; dayon, aron paglikay sa atensiyon sa media, nibalhin si Osmeña og pribadong pinuy-anan ug ang mga doktor na lay gipaadto aron pagtambal niya. Duha ka bersiyon ang tumoy sa sugilanon: Una, nga nibalik ang kanser ni Osmeña; ug ikaduha, nga nagpa-opera sa iyang hernia.

* * *

Duha sab ang bersiyon sa kampo ni Osmeña: Una, nga igo lang nagpa-checkup ang kongresista sa MD Anderson Cancer Center sa Texas; ug ikaduha, nga nagpahimus siya sa bag-ong teknolohiya nga nakaplagan sa iyang mga doktor sa Anderson nga mohatag niya og katakos sa pagpangihi sa naandang paagi busa di na siya magkinahanglan og urinary bag sa iyang pagbalik sa Sugbo sa mosunod nga mga adlaw. Nitumaw ang mga huhungihong tungod sa kapakyas ni Osmeña pagpahibawo sa mga Sugbuanon sa tuyo sa iyang paglarga. Lahi sa iyang boluntaryo nga pagpahibawo sa kanser ug pagtangtang sa iyang urinary bladder duha ka tuig ang nilabay.

* * *

Duna koy laing nadunggan nga huhungihong: Dakong opisyal sa Comelec sa Sugbo gidudahan nga tua kapusta sa usa ka politikanhong pundok. Gawas sa pipila niya ka kadudahan nga lihok, nasakpan pa gyud nga may transaksiyon uban sa nahisgutang pundok. Kining maong opisyal sa Comelec gipasanginlan nga maoy nagprinta sa tanang tarpaulins ug propaganda materials sa iyang kinaham nga politikanhong pundok. Kasaligang mga tinubdan nangagpas nga ang opisyal way kaugalingong imprintahanan. Igo lang nangahente apan maoy nisipong sa labing dakong bahin sa komisyon. Kuwestiyonable nang daan ang ilang transaksiyon sa propaganda materials, hinaot nga di na mananga sa lain, sama pananglit sa pagsabotahe sa kaligdong sa umaabot nga piniliay, ang ilang konsabo.

* * *

Email: [email protected]