Walay baruganan!

Bilib ko ni Kongresista Rachel “Cutie” Del Mar kay gihiklin niya ang iyang personal interest ug gipalabi niya nga ang iyang Daddy nga si Raul maoy molansar balik sa maong katungdanan sa eleksyon sa sunod tuig.

Pwerteng lig-ona sa kandidatura ni Raul diha sa north district ug sigurado ko nga siya ang modaug. Ang ubang kandidato pagka kongresista sa north district, akong natan-aw nga pareho nga adunay katakus, apan lupigon sila kay ilado kaayo ang mga Del Mar.

Bisan bata gud makaila sa mga Del Mar. Apan hatagan nato og higayon nga ang ubang kandidato sa maong katungdanan makahimo og maayo nga kampanya pinaagi sa pagladlad sa ilang plata-porma ug dili lang apilan og pagpangdaut.

Gidungog man gud nga ang ubang kandidato kuno palaaway kaayo, apan gipasalig ni Del Mar nga dili nila tugbangan ang maong batasan kay ang ila mao ra ang pagpasabut sa katawhan nga gusto nila nga ipadayon ang maayo nga serbisyo.

* * *

Nalipay diay ko kay ang suod nako nga amigo, si Pagcor Manager Renato “Junjun” Osmeña, wala na lang modayon sa pagdagan isip kongresista sa north district.

Gusto man gud unta ni Junjun nga moserbisyo sa katawhan, apan mas maayo na lang nga nadala sa tambag nga dili pa karon ang tukma nga panahon.

Bata pa ang akong higala mao nga daghan pang tuig nga mahimo siya nga makadagan. Anugon kaayo ang iyang maayo nga trabaho nga manager sa Pagcor diha sa Park Mall.

Kumusta Sir!

* * *

Magkatawa ko maghuna-huna sa ubang kapitan nga misuporta ni Mayor Michael Rama. Dunay pipila nga miangkon nako nga kun padayon pa nga nakigsuod nila si Kongresista Tomas Osmeña, dili sila mobuwag sa pagsuporta sa BOPK.

Nagpasabut kini nga taphaw ra diay ang ilang suporta kang Mike? Dunay ubang kapitan nga maayo kaayo nga magsigi’g bitbit sa butang nga hinatag ni Tommy, apan pwerteng kusuga modaut sa naghatag sa maong butang.

Dili ba hilas kaayo? Akong nasabut nga mora sila og ikatandi sa “flower dance” nga abi kay si Mayor Rama man maoy nakahatag og daku nga kantidad, tua sila.

Hinoon, ang bugnaw kaayo nga “brand new” nga sakyanan nga gitugyan ni Mayor Rama kanila maoy magsilbi nga rason nga misuporta sila sa mayor.

Gikuyawan ko nga basin og hatagan usab sila ni Tommy og mas daku pa nga kahimanan, motakli na usab sila sa suporta sa BOPK ug biyaan na usab nila si Mike.

Paita aning mga tawhana, walay mga baruganan!