Sa pag-file sa COC ang mga kandidato

Bisan kun maka-file na ang mga kandidato sa 2013 election sa ilang mga Certificate of Candidacy (COC) apan dili pa sila maisip nga mga kandidato sanglit wala pa man magsugod sa pag-ihap ang 45 ka adlaw alang sa ilang pagpangampanya.

Ang Oktubre 1 ngadto sa 5 maoy lima ka adlaw nga gihatag sa Commission on Elections (Comelec) alang sa pagsumitir sa mga kandidato sa ilang COC apan magsugod ang ilang pagpangampanya nga molungtad og 45 ka adlaw unya pa sa Marso sa sunod tuig.

Hinuon wala hikawi sa COMELEC ang mga mokandidato sa pagsuroy sa kabarangayan sa pagpadayon sa ilang pagpakighimamat sa katawhan ug sa pag-awhag nga paluyohan ilang kandidatura.

Matud pa nila nga ang 2013 lokal eleksiyon maoy labing taas nga mga adlaw sa pagpaila sa ilang kandidatura maoy hinungdan nga ang bag-o nga pangalan sa natad sa politika dako kaayo og panahon alang sa pagpaila sa ilang kaugalingon. Dugang pa nila nga ang sayo nga pag-file sa ilang COC maoy labing dako usab og magasto nga salapi ang mga kandidato kay magsige na man sila sa pagsuroy sa kabarangayan sa pagpangyawat nga daghan ang makumbinsir nga suportahan ilang kandidatura. Gitataw nila nga gawas nga nagkinahanglan nga mogasto ang mga kandidato sa matag adlaw nilang pagsuroy sa kabarangayan sa panahon sa ilang pagpangampanya dili usab ikahiklin ang mga tawo nga mag-ambahan sa ilang mga panimalay alang sa pagpangayo og hinabang. Sa panahon sa Pasko dili usab kabaliran ang mga tawo nga moadto sa panimalay sa mga kandidato alang sa pagpamasko nga maoy hinungdan nga ang marunong nga mga politiko manago ug ang pipila kanila manglarga sa pagbakasyon ngadto sa gawas sa nasud sa paglikay sa daghang mga tawo nga mangayo og pinaskohan ug liwas sa Pasko na kini nga mobalik nga mao usab ang pagsugod sa kampanya. (Romeo T. Limpangog)