Usba ninyo ni uy

Tan-aw nako magkaproblema gayud ang Cebu City government sa iyang panggasto tungod sa kadaku sa gikinahanglan niini nga kantidad aron mapundohan ang tanan niining mga gastohanan.

Gawas sa mga proyekto nga mogasto og minilyon ka pesos, ang kagamhanan sa dakbayan migasto pa gayud og hilabihan kadagku nga mga honorarium nga gihatag nila sa mga huwes, fiskal ug sa mga clerk of courts.

Dili man problema kun hatagan kini sila og mga allowance sa City Hall apan kun palab-anan na lang usab ang kantidad nga mas daku pa gani kay sa sweldo sa mga ordinaryo nga kawani, mora’g dili na usab maayo.

Sa akong nahibaw-an nga ang mga justices sa Court of Appeals nga ania magbasi sa Sugbo apil ang mga huwes sa Regional Trial Court, walay labut sa pipila nga wala modawat, nagdawat og allowance nga katumbas sa ilang binuwan nga sweldo gikan sa Supreme Court.

Unya kay ang mga justices ug ang mga huwes dagku man kaayo og sweldo, sa ato pa pwerteng dakua sa gasto sa Cebu City government.

Ang allowance sa mga fiskal dinhi sa dakbayan giusbawan pa g’yud gikan sa tag P10,000 ang buwan karon gihimo nila nga P18,000. Resulta, ang P2.94 million nga budget nga gitagana sa City Hall isip cash assistance sa mga fiskal nahurot na.

Nangayo na usab si Cebu City prosecutor Nicolas Sellon og dugang budget. Tan-aw nako maabtan og siyam-siyam ang maong hangyo kay nihit kaayo karon ang kwarta sa City Hall.

Tambag usab nako sa mga kawani sa ubang ahensya sa kagamhanan, ayaw tawon mo pagpasuwabi sa inyong kapritso uy. Dagku na baya na’ng inyong sweldo, sama sa mga Clerks of Court sa RTC, nangayo usab og dugang allowance.

Usbon nako, dili illegal nga mohatag ang City Hall og allowance apan igo-igo lang. Ang maong kwarta nga gihatag sa maong mga justices, huwes, fiskal ug mga clerks sa hukmanan, gikan kana sa buhis sa katawhan.

Kamong mga opisyal sa dakbayan dili ba kamo maikog sa mga magbubuhis nga samtang daghan sa katawhan ang nag-antos sa kalisud unya gipaburot ninyo og maayo ang pitaka niining mga tawo nga daan na nga dagku’g sweldo?

Gamita usab tawon ang inyong mga utok uy. Tiaw mo, sa Cebu City prosecutors office kay tag P18,000 man ang allowance matag buwan sa kada usa sa 24 ka fiskal, kapin sa P400 mil kon dul-an sa tunga sa milyon ang gastohon sa City Hall alang kanila.

Espoko ba gud kanang maong kantidad? Daghan na kaayo nga proyekto ang mahimo niining maong kwartaha kun ayuhon lang sa paggasto.