Langyaw nga hanas sa pagsulti og Binisaya

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Daghan ang nag-ingon nga ang pipila ka mga Sugbuanon nga nagpuyo na sa Manila sa ilang pagpauli dinhi sa Sugbo daw magkayungit na nga mosulti sa ilang kaugalingong pinulongan nga Binisaya.

Matud pa nila nga hanas na kining mosulti sa pinulongang Tagalog nga ang wala makaila kanila daw magtuo gayod nga lumad kining taga Manila ug daw bation na kini og kaulaw nga mosulti sa tinuod nga lumad nga Sugbuanon.

Dugang pa nila nga mao kini ang hinungdan nga didto sa Manila dili gayod mahibaw-an nga daghan na nga nagpuyo nga mga Bisaya kay tagalog na man ang pinulongan nga gigamit sa matag adlaw niining paglihoklihok.

Gipasabot sa pipila nga nakasinati sa maong kahimtang nga dako man gud kuno ang kalainan ang pagtagad sa lumad nga Sugbuanon kun itandi sa Tagalong nga ilang gisabot nga de kalidad og kahimtang.

Gitataw nila nga mao usab ang kahimtang sa mga Sugbuanon nga makapuyo na og pipila ka tuig sa nasud sa Amerika tungod kay sa ilang pagpauli dinhi sa Sugbo daw magkayungit na nga molitok sa kaugalingon niining pinulongan nga Sinugbuanon kay magsige na man garbo na man kaayo nga magpunay og Inglis-Inglis.

Lahi usab ang kahimtang sa usa ka Amerikano nga kustomer sa Marscha K nga usa ka de kalidad nga kan-anan nga nahimutang sa Unit 3 and 4 sa Oakridge Business Park nga nahimutang sa dalan A.S. Fortuna sa Banilad, dakbayan sa Mandaue nga gipanag-iya ni Marina Enriquez nga taga dakbayan sa Danao.

Ang maong Amerikano nga magduawan lamang dinhi sa Sugbo sa pagbakasyon sa matag tuig nga nakabaton og mga higala dinhi sa Sugbo apan hanas na kaayo nga mosulti sa pinulongang Sugbuanon.

Matud pa nila nga gawas nga hanas ang maong langyaw sa pagsulti og Sinugbuanon daw nakasagop usab kini sa pagkaon sa kalan-ong Sugbo nga naglakip sa Sutukil kon Sugba Tuwa Kilaw nga nakaaghat sa tag-iya sa pagtukod usab sa maong matang nga kan-anan sa maong lugar.