Angayan upod ang mga putot

Sulod sa taas nga katuigan nga nahikawan ang mga putot sa ilang kagustohan nga makasulod ug makatrabaho isip police, bombero ug jail guards tungod sa dili makiangayon ug walay basihanan nga rekisitos sa pagsulod sa nahisgotang trabaho. Ang akong gipasabot mao ang height requirement.

Karon nga giwagtang na ang height requirement alang niadtong gustong mag polis, bombero ug jail guard, aduna na gyod intawon kahigayonan nga mapolis, mabombero ug majail guards ang mga putot. Salamat ni Kongresista Pablo John Garcia sa ikatulong distrito sa lalawigan sa Sugbo nga nakasabot ug namati sa yangungo sa mga putot. Salamat niya kay siya gyod ang nangamahan sa balaudnon nga nagwagtang sa height requirement alang niadtong mag polis, mag bombero ug mag jail guards nga napalabang na sa ubos balay balauranan. Ang nahisgotang balaudnon dako usab og posibilidad nga makalusot sa senado.

Sa pagka tinuod wala gyoy pagtoon nga gihimo nga miingon nga dili epektibo sa iyang trabaho ang usa ka tawong mubo o putot. Busa ang pagdili kanila nga makasulod sa nahisgotang trabaho tungod lang sa ilang pagka putot usa ka pagbugal-bugal ug pagbiay-biay, inhustisya ug dili makiangayon kanilang gipanganak nga mga putot. Angayang hinumduman sa mga opisyal sa kapolisan, kabomberohan ug jail management nga kining mga putot dili intawon ang nagbuot sa ilang height. Busa dili makiangayon nga silutan sila sa ilang naangkong gitas-on.

Ako manghinaot nga ang mga senador motan-aw usab sa kahimtang sa mga putot nga gisilutan tungod sa ilang gitas-on. Mahimo untang sumbanan sa mga senador ang napalabang nang balaudnon sa ubos balay balauranan nga gipangamahanan ni Kongresista Pablo John Garcia.

Makita unta sa mga senador nga ang pagka epektibo sa polis, bombero ug jail guards dili masukod sa ilang gitas-on kun dili masukod kini sa ilang dedikasyon.