Financial assistance, dugay nadawat

Ang Integrated Bar of the Philippines kon IBP adunay financial assistance or death benefits nga ihatag sa ilang mga miyembro nga way sipyat nga mobayad sa ilang tinuig nga bayranan. Kini isip abag sa pamilya sa abogado nga mitaliwan na. Ang IBP-Manila ang mo-release sa maong pundo apan ang pagduso sa mga gikinahanglang rekisitos adto ra isumiter sa local IBP office. Unsay mga rekisitos niini ug asa iduso ang maong mga papeles? Kana nga pangutana ang atong tubagon karon.

* * *

Dear Atty.Divine,

Maayong adlaw kanimo attorney, nia unta koy ipatabang nimo. Ang akong anak nga abogado namatay atong Mayo 27, 2011 sa edad nga 38 anyos ug aduna kini 8 anyos nga anak. Ang Integrated Bar of the Philippines kon IBP miingon nga adunay madawat nga financial assistance gikan sa IBP ang pamilya sa akong anak ug dali ra kini makuha basta kompleto lang ang gikinahanglan nga mga dokumento. Amo nang gi-file ang tanang papeles apan hangtud karon attorney September 4, 2012 na wa pa man gyud ma release ang kwarta. Magsige mi og tawag sa IBP-Cebu ila na kuno nga gi-follow-up sa Manila ug magpaabot lang daw mi. Attorney magpatabang unta mi nimo og follow-up kay maayo na lang nang P 20,000 nga hinabang alang sa akong apo kay wa man gyuy gibilin ang akong anak alang sa iyang pamilya. Hangtud karon gikaguol ko pag-ayo ang iyang pagkamatay. Daghang Salamat. —Mrs. F.M. Soliva, Lilo-an, Cebu

* * *

Dear Mrs. Soliva,

Ako nang gitawgan ang IBP-Cebu labot sa imong problema ug ilang gipahibawo nga atul sa akong pagtawag, inyo na daw nga nadawat ang financial assistance gikan sa IBP-Manila. Ilang gipasabot nga usually dali ra man gyud unta kono na apan sila mismo wa masayud kun nganong nadugay ang inyong financial assistance sa pag-release bisan kun kanunay nilang gi-follow-up. Ang IBP-Manila mao man gud ang mo-release niini apan ang pagsubmit sa mga dokumento mamahimo ra nga anha sa Local IBP Office. Kasabot ko sa inyong bahin nga maayo na lang ikatabang sa bata ang maong kantidad. Manghinaut ko nga pagkakaron wa na kamoy problema niini kun tinuod nga inyo na gyung nadawat ang cheke gikan sa IBP. Akong pahasubo sa imong pamilya sa sayong pagpanaw sa imong anak nga abogado. Daghang Salamat. — Atty. Divine

Alang sa pamilya sa mga abogado nga gustong mo-claim og death benefits or financial assistance sa IBP, mosumiter lang sila og : 1) Death Certificate sa abogado nga namatay.

2) Affidavit of Heir ug 3) Marriage Contract. Kining maong mga rekisitos inyong iduso sa IBP Office diin siya nahisakop ug sila na mismo ang mosumiter niini ngadto sa IBP-Manila.

Kun aduna moy pangutana ipadala lang sa Legal Corner sa Banat News or email sa [email protected]