EDITORYAL - Ang sidewalk ug ang street children

Kaanindot laktan sa mga sidewalk karon sa dalan Osmeña Boulevard kay gi-tiles na sa gobiyerno.

Dugay kaayong nahunahunaan ang maong pagpaanindot sa kagamhanan luyo sa panlimbasug niini nga makadani og daghang turista.

Maayo unta kun sa kaanindot subayon sa mga sidewalk sa uptown area mawala usab ang mga snatcher nga makapaislag sa mga turista.

Apan lahi sa dalan Colon ang labing karaan nga karsada sa nasud tungod kay sukad sa panahon ni Magellan hangtud karon gamay ra kaayo’y umento.

Kun magdanghag ka sa paglakaw sa mga sidewalk sa maong karsada aw segurado nga mabakol ka kun madagma gumikan sa ka-way hapsay niini.

May lawom, may sagkaon usab ug labaw sa tanan ang laksot kaayong dekorasyon sa maong mga sidewalk sama sa mga batang gagmay nga ipaligdas lang adlaw ug gabii uban ang mga hamtong ug mga ginikanan niini.

Presente usab ang mga mangunguot, snatcher ug mga tulisan sa maong mga sidewalk nga delikado kaayo alang sa publiko.

May mga vendor nga nanginabuhi sa maong lugar nga iya sa publiko ug imbis kaabag sila sa gobiyerno sa pagbantay sa publiko agi og kaikog ug  utang nilang kabubut-on niini tungod kay ang lugar nga alang sa tanan sila ang gisuwerte nga makapanag-iya niini, wala sila’y nahimo apan nakapasamok na hinuon sa agianan sa katawhan.

Ang mga tag-iya sa mga tindahan sa Colon mao nala’y nagbuot sa pagpaugdo sa ilang atubangan aron di bahaan sa panahon sa tinguwan, tungod kay wa magpakabana ang kagamhanan sa pag-ayo sa sidewalk nga ilang nahimutangan.

Ang ubang tag-iya sa tindahan nagpaabot nga mulihok ang gobiyerno aron paaninduton usab ang sidewalk nga may labing daghang tawo adlaw ug gabii, apan wa nila hisayri kun kanus-a.