Suliran sa paghipos sa basura.

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Nahimong dako karon nga suliran sa mga lokal nga kagamhanan ang higpit nga pagpatuman sa Republic Act 9003 kon Solid Waste Management Act nga nagmando alang sa tukmang paghipos sa mga basura dinhi sa nasud.

Ang mayor sa lungsod o dakbayan maoy gitahasan sa pagpatuman sa maong balaod ug aron mahimo kining epektibo maoy gihatagan og dakong kaakohan ang mga barangay kapitan alang sa paghingpit sa pagpatuman ngadto sa matag molupyo niini.

Ang mga barangay kapitan sa ilang pagpatuman sa matag molupyo maoy ilang gihimo ang pagbahig sa madunot ug dili madunot nga mga basura sa tuyo nga ang magamit hipuson ug dili na gayod magamit maoy ilabay ngadto sa dumping area.

Dugang nga tahas sa mga barangay kapitan mao ang pagpataod og ilang kaugalingong Material Recovery Facilities (MRF) sa tuyo nga ang ilabay nga basura mabahig daan ang madunot ug dili madunot nga basura ug mahipos usab ang basura nga mahimo pa nga magamit.

Kini maoy nahimong suliran sa matag barangay ang katukoran sa ilang MRF kay nagkinahanglan man kini og bakante nga luna nga ilang kapahimutangan.

Nunot niini ang pipila ka mga barangay kapitan moingon nga bintaha lamang kadtong mga barangay nga nakapanag-iya og kaugalingong dakong luna nga maoy ilang kapahimutangan sa tukoron nilang MRF. Ang mga barangay nga walay kaugalingon nga kabutangan og MRF maoy pagahimoon ang pagdangop ngadto sa luna nga pribado pinaagi sa paghangyo sa tag-iya sa pag-abang o bulontaryo lamang nga pagpagamit.

Kun daghan ang molupyo nga nagpalibot sa maong dapit mahimo na usab kining problema kay moreklamo man usab sa dili masingo nga kabaho sa mga basura nga gitapok nga mga basura sa maong dapit ug laing suliran na usab nga nagkinahanglan og tukmang kasulbaran.