Putol ang ambisyon

Kun ang pagpakahilum ni Gobernador Gwendolyn Garcia maoy atong basihan, dakong tsansa nga matinuod kining mga hungihong nga mo-back out siya sa iyang intensiyon pagdagan pagka-senador aron pagkandidato na lamang pagka-kongresista sa ikatulong distrito sa lalawigan sa Sugbo.

Apan kun padayong sirado ang baba sa gobernadora niining mga taho, makaingon kita nga talikdan na gayud niya ang ambisyon nga mag-senador. Hinuon alang kaniya, lisod usab niyang talikdan ang maong ambisyon tungod lagi sa iyang tumong pag-serbisyo sa nasud, dili lamang sa mga Sugbuanon.

Apan kun ang mga survey maoy atong pabut-on, dili gayud mahimong senador si Garcia. Sa mga survey sa Social Weather Station, Pulse Asia ug uban pa, dako og biya si Garcia sa mga senatoriables. 

Hinuon adunay improvement sa iyang ranking, apan anaa ra kini sa tunga-tunga sa mga listahan sa tanang senatoriables. Lisod pa nga makasulod siya sa magic 12 niining nagkaduol na nga pag-file sa certificate of candidacy.

Kun ako’y Gobernador Gwen, moatras gyud ko sa akong kampanya alang sa Senado. Klaro gayud nga wala siyay tsansa nga makadaug. Sayang lamang iyang mga paningkamot nga mailhan tibuok nasud.

Mas maayo pang magkongresista na lamang siya sa ikatulo nga distrito diin hilabihan ka dako iyang tsansa nga modaug. Kini tungod kay balwarte sa mga Garcia ang maong distrito ug wala gayuy makapildi niya didto.

 Adunay mga taho nga ang mga mayor ilalum sa One Cebu Party nga gipangulohan ni Garcia gusto nga ari sa Sugbo gayud mokandidato ang gobernadora. Moapelar kuno sila ngadto kang Garcia nga i-withdraw na lang niini ang kampanya alang sa Senado tungod kay gikinahanglan pa siya sa mga Sugboanon.

Bitaw. Usik lamang sa kuwarta ang iyang ambisyon nga mag-senador tungod kay wala gayuy tsansa siya nga makadaug. Bisan pa man kun highly-qualified siyang mahimong senador, apan kulang gayud siya sa popularidad sa Luzon ug Mindanao aron modaug sa umaabot nga eleksiyon. Maayo pang maminaw na lamang siya sa panawagan sa mga mayor. Dako iyang mawala kun mopadayon siya sa iyang ambisyon nga mag-senador tungod kay siguradong mapildi gayud siya