Leksyon sa polis

Ning bag-ohay lang nabaniog ang giingong pagpangulata sa duha ka sakop sa Special Weapons and Tactics sa usa ka Papua New Guinea citizen nga sumala pa sa mga balita anak diay og usa sa mga miyembro sa parliament sa ilang gobiyerno didto. Ang estorya nagmaoy ug nakig-away si Benedict Penini sa kababayan, hubog kaayo ang maong langyaw ug namato ug nakapanakit pa og usa ka drayber sa taksi.

Ang atong mga abtik nga polis miresponde, apan inay nga mapakalma ang sitwasyon misangpot pa kini hinuon sa problema alang sa atong duha ka SWAT nga sila si PO2 Bradford Lavandero ug PO1 Phillip James Tanza nga giimbestigar karon sa Internal Affairs Service sa PNP.

Sa maong insidente daghang nakitang sayop ug kakulangon sa atong mga polis bisan pa gani sa atong mga elite security forces sama na lang sa SWAT. Leksyon nga angayang timan-an.

Una, dili unta maingon niadto kung duna silay stun gun nga makapa-neutralized sa maong langyaw.

Dili man siguro bawal ang paggamit og stun guns sa mga law enforcers. Kung duna sila niini may alternatibo silang mahimo ug malikayan unta paggamit ang pwersa nga usahay di kalikayang maapilan og personal nga kalagot maong dunay higayon nga masobrahan ang unta “just force.”

Ikaduha, daghan sa atong mga polis ang dili gyud makamaong mangamot ilabi na sa disarming, sagad kanila diretso og bunot sa ilang pusil bisan dili pusil ang gikuptan sa ilang dakpunon. Ang resulta humok kaayong makapusil. Base sa balaod, ang IAS motu propio nga moimbestigar basta dunay discharge sa weapons sa polis, ingon man sa mga kwestyonableng aksyon sa kapolisan pagtuman sa ilang trabaho. 

Mahinungdanon usab ang karakter sa usa ka polis, kalmado gyud unta sila sa matag sitwasyon nga ang tumong mao gyud ang pagprotektar sa katawhan apan dili isip mga hukom kay kung dili sila gihapoy maghitsurang mga de-unipormeng badlungon.

Kung seryosuhon lang unta sa mga polis ang pagtuon sa martial arts nga specialized sa disarming sama sa pagseryoso nila sa gun proficiency training paggamit sa ilang mga service firearms o ba kaha pagdala og dili lethal nga armas sama sa stun gun, duna unta silay alternatibong dili kaayo bug-at ang tulubagon kung magkinaunsa man. O ba kaha gikan sa kontrobersiya. Mahimo man sa polis ang ilang trabaho nga pinasubay sa proseso ug sa balaod. Numero unong kinahanglang ipakita sa mga polis sa publiko sila protektor sa kinabuhi, suspek man o biktima. Ang hustisyang mapahamtang sa korte maoy kahupayan sa mga biktma samtang ganti kini sa pagkamaayong laki sa kapolisan.