Utang sa MCIAA sa Lapulapu

Ang joint venture agreement tali sa Mactan Cebu International Airport, sa Ayala Corporation ug Aboitiz Equity Ventures alang sa katukoran sa bag-ong passenger terminal sa airport usa ka makaayo nga lakang aron mapalambo ang serbisyo sa atong tugpahanan.

Dako kining tabang sa ekonomiya sa Metro Cebu, ilabi na sa isla sa Mactan, nga misandig og dako sa industriya sa turismo.

Apan wala makaagwanta si Mayor Paz Radaza. Kay samtang gipakita sa tagdumala sa MCIA nga makahimo kini sa pag-finance og mga proyekto pagpalambo sa tugpahanan, padayon niining gi-isnab ang kagamhanan sa Lapulapu pinaagi sa pagdumili pagbayad sa buhisanan niini.

Nganong dili man tuod atubangon sa MCIAA board ang tulobagon niini sa kagamhanan sa dakbayan nga aduna man kaha kini igong salapi sa pagbayad niini?

Ang MCIA adunay utang nga real property taxes nga mobalor og P1.4 bilyones. Bisan katunga lang gani niini, dako na kaayo og ikatabang. Si Radaza sa iyang pamahayag nga gipadala sa The Freeman nagkanayon nga ang ibayad sa MCIA nga utang sa buhis gamiton sa pagsulbad sa kakulangan sa classroom sa dakbayan sa Lapulapu.

Mas maayong magsabotsabot ang MCIAA ug ang kadagkoan sa Lapulapu. Walay laing mabulahan niining buhis kun dili ang katawhan lamang, ilabi na ang mga bata nga nagkinahanglan og dugang pang lawak-saringan.

* * *

Nanimaho na gyud ang politika karon nga minus usa ka buwan na lang mosang-at na sa ilang sertipiko de kandidatura ang mga kandidato.

Mga banner nanglupad na sa nagkalainlain nga lugar bisan wala pa ang election period. Klaro kini nga violation sa election law, pero ambot hain na kining mga election officers. Sa unang distrito, nagbansiwag na ang banner ni Konsehal Yayoy Alcoseba. Kang Jun Pe nga konsehal sa north district sa siyudad sa Sugbo, naa na pud nagbansiwag sa south district, maayo lang og walay mo-petisyon niya.

Sa mga pamantalaan, aduna nay mga “political ads” pero dili pa hinuon makonsiderar nga violation kay wala man maghisgot sa ilang kandidatura ang mga personalidad.

Pero nalingaw ko sa advertorial ni Konsehal Bebot Abellanosa ning Banat News kagahapon nga nanghambog sa iyang educational attainment nga nagkanayon “valedictorian” siya gikan sa elementarya, high school ngadto na sa college.

Naa ba diay valedictorian sa college?