Ang pagkasulugoon sa Ginoo dili hingpit kung wala kay kinaiya sa pagkamapahiubsanon. Ang pagahin og panahon sa uban kaysa paghatag og panahon sa kaugalingon maoy mahimong latid sa imong kinabuhi.
Sa atong pagkatawhanon mopasulabi usahay ang garbo ug mithi para sa atong kabulahanan. Moalagad kita aron kita mahimong inila, makuartahan ug daghan ang moabi-abi kanato.
Gani sa atong paghalad sa Ginoo nag expektar kita nga ibalik sa ato sa katulo ka pilo nga grasya. Aduna gayud mga kondisyones ug pabor nga atong pangayoon kung kita mag-ampo ug mangalagad usahay nahikalimot nga ang Ginoo nahibalo na sa atong panginahanglan bisan pa man kung dili mobuka ang atong mga baba sa pagpangayo.
Ang matuod nga alagad dili mogamit sa Ginoo sa iyang tumong hinunoa ang Ginoo maoy pagamiton kanato sa iyang mga plano.