Ang Dios Miingon Pagkamahadlukon

Nangutana ang doktor sa iyang pasyente nga nangluspad. Nganong hadlok man ka kaayo? Nitubag ang pasyente, “pirmero man gud ni nakong pa opera dok.”, “ ah!mao ba way problema kay pirmero man pod ni nakong opera.”

Sa maong kahimtang makita nimo ang duha ka klase nga personalidad, ang mahadlukon nga maoy timaan sa kakuwangan sa pagsalig sa kaugalingon ug labaw na sa pagsalig sa Ginoo. Ang doktor sa iyang bahin usa ka tawong andam mohimo sa gimbuhaton nga gitahas kaniya bisan pa man sa pagka walay eksperensiya sa paghimo sa ingon apan anaa kaniya ang tumang pagsalig nga mahimo kini niya.

Ang pagpangalagad wala kini magsukad sa imong kasinatian apan kini imong mahimo kung anaa ang espirituhanong gugma sa paghimo niini, kay pinaagi niini andam kang mosagubang sa tanang babag sa imong mga gimbuhaton.

“Trust in the Lord with all your heart; and lean not unto your own understanding. In all your ways, acknowledge him, and he will direct your paths. (Proverbs 3: 5-6)

Tikdol

Pamolitika sa basura

Ni John Rey Saavedra

Mura’g nagpaklaro na usab ang negosyanteng si Efrain Pelaez Jr. sa 2013 nga eleksiyon batok kang Lapu-Lapu city Mayor Paz Radaza.

Pero ambot og nakahunahuna ba si Jun Pelaez nga sa iyang pag-apil sa kasong kalapasan sa Solid Waste Management Act sa 29 ka mga kapitan sa dakbayan sa Lapu-Lapu, mo-boomerang ra kaniya ang klase sa pamolitika nga iyang gisugdan.

Bisan unsaon og pangulipas ni Jun Pelaez, maklaro man gyud nato nga pamolitika kanang iyang pagkiha sa mayor sa dakbayan sa Lapu-Lapu ug sa 29 ka kapitan, sama sa iyang gibuhat kaniadtong unang pagsakbang niya sa mayor apan napilde, nga ikiha una niya ang iyang ikaatbang.

Wala na lang gyud intawon lain isyu nga nakita si Jun Pelaez batok sa administrasyon sa Lapu-Lapu mao nga midasmag na lang kini sa solid waste management nga isyu aron iyang ikayawyaw sa entablado ini’g sugod na unya sa kampanya.

Kining 29 ka kapitan nga giapil og kiha ni Pelaez mga supporters ni Mayor Paz. Pero sa 29, wala gyud niya iapil sa pagkiha ang kapitan sa barangay Basak nga hilabihan ka supakero sa programa sa siyudad sa Lapu-Lapu kabahin sa solid waste management.

Ang kapitan sa Basak nga si Isabelito Darnayla kontra man ni Mayor Paz. Sa ato pa, posible kining mahimong supporter ni Pelaez sa 2013 mao nga wala kini niya i-apil sa pagkiha.

Sa akong nahibaw-an, makadaghan na giisyuhan og solid waste citation tickets ang barangay Basak, apan padayong walay aksiyon sa problema sa basura sa barangay si Darnayla.

Nagtuo ang mga opisyal sa Lapu-Lapu nga sabotahe sa paninguha sa siyudad sa Lapu-Lapu ang gihimo ni Darnayla kay lagi dili man siya sakop sa administrasyon. Adunay pagtuo nga si Darnayla dili kamao modumala sa suliran sa basura sa iyang barangay, ug kun mao ni, maayong ilisan.

Apan ngano usab kahang wala man ikiha sa siyudad sa Lapu-Lapu si Darnayla kun nagpadayon kini sa pagsupaksupak sa programa sa solid waste?

Sumala pa sa press statement sa mayor, ang kagamhanan sa siyudad na ang nangolekta sa basura sa Basak.

Unya, bisan ang mga alyado sa administrasyon nga nagsupaksupak sa programa sa siyudad kalabot sa kalimpyo gikiha usab sa mayor tungod sa kalapasan sa balaod sa basura.

Gawas niini, sunodsunod nga seminar gihimo sa kabarangayan aron mapasabot ang epektibo nga pagdumala sa solid waste. Mismo ang commissioner sa National Solid Waste Management mi-atender sa seminar.

Gi-partner usab sa siyudad ang USJR sa paghimo og Eco-tourism police uban ang youth sa siyudad isip mga miyembro, gawas sa public education.

Usa pa, ang MRF usab sa Lapu-Lapu gidungog man usa sa labing nindot sa Sugbo, kun dili man sa rehiyon. Magbukas pa gyud sila og MRF sa isla sa Olango, gawas sa 19 ka barangay nga aduna nay ilang MRF.

Nahimo pa gyud nga paboritong destinasyon sa Lakbay Aral kalabot sa solid waste management ang Lapu-Lapu.

Unya, unsa may ebidensiya ni Pelaez sa iyang kiha batok kang Mayor Paz ug sa 29 ka kapitan?

*  *  *

Wala gyud ko masayop sa akong pangagpas nga si Mar Roxas ang itudlo ni Pres. Noynoy Aquino sa DILG, hulip sa namatay’ng kalihim nga si Jesse Robredo.

Niini karong pagkatudlo ni Mar, ang kampo ni Bise Pres. Jejomar Binay ang gikugangkugangan. Si Binay puwerte nang pagkahambugero nga nagkaklaro na ang iyang pagdagan pagka-presidente sa 2016.

Mao kini akong giingon nga puwerte pa gyung layoa sa 2016 ug daghan pang mahitabo kang Binay.

Kun makonpirmar na sa Commission on Appointment si Roxas, magsugod ang kalbaryo ni Binay.

Gani, karon nga si Ma. Lourdes Sereno na ang chief justice sa Supreme Court, gikuyawan ko og dunay milagrong mahitabo sa kasong gisang-at ni Mar batok kang Binay didto sa Presidential Electoral Tribunal (PET) tungod sa iyang pagtuo nga gitikas ni Binay ang eleksiyon pagka-bise presidente niadtong 2010 nga eleksiyon.

Human madesisyonan sa CA ang appointment ni Roxas, makit-an nato ang “gubat” tali sa Office of the Vice President ug sa Department of Interior and Local Government (DILG).

Tan-awon nato asa sa duha ka buhatan ang mosaler – ang opisina ba ni Binay nga nakatutok sa housing program sa kagamhanang nasyonal o ang DILG ni Roxas nga maoy mag-superbisar sa tanang lokal nga kagamhanan, kapolisan, kabomberohan ug prisohan.

Dili makalimod si Roxas ug si Noynoy nga political strategy kining pagbutang niya kang Roxas sa DILG.

Usa sa akong nakita, buot ni Noynoy nga maseguro ang kadaogan sa usa ka Liberal karong 2016 aron walay kasong manglupad human sa iyang termino.

Kinsa may laing Liberal nga usa ka presidential timber?